Gitulis, gituok patay

CEBU, Philippines - Usa ka retiradong kawani sa Bureau of Customs (BOC) ang gituohang gituok sa liog sa wala pa mailhing tulisan nga nakasulod sa iyang panimalay sa miaging buntag diha sa sitio Capotatan sa barangay Ginacot,dakbayan sa Danao.

Si SPO1 Wendy Pilapil sa kapolisan sa maong dakbayan miila sa namatay nga mao si Andres Bontia Flores, 78, nag-inusarang nagpuyo sa nahisgutang dapit.

Matud pa ni Pilapil nga ang silingan sa biktima nga si Ereneo Capin, 48, maoy unang nakadiskubre sa patay’ng lawas sa biktima alas-6 pasado ang takna sa buntag kagahapon dihang iyaha unta kining gisangpit apan wala motubag maong iyahang gilili sa buslot sa bungbong.

Si Pilapil miingon nga natingala ang silingan sa biktima nga naguba ang bintana sa panimalay ug sa iyang paglili sa buslot nakit-an niya kini sa sulod nga nagbuy-od na ug wala na maglihok.

Gituohan sa kapolisan nga ang mga tulisan nakasulod sa panimalay sa biktima pinaagi sa paglungkab sa bintana ug gidudahang misuway og sukol ang biktima maong gituok hangtud nga namatay.

Si SPO2 Allan Muños usa sa mga mirespondeng polis miingon nga nagkatuali na ang mga butang sa sulod sa panimalay sa biktima nga timailhan nga giutingkay kini sa mga tulisan.

Gikatahong nangawagtang na ang kwintas, singsing, mahalong relo de pulso kanunay’ng suoton sa biktima ug nagduda ang kapolisan nga aduna usab wala matinong kantidad sa kwarta nga nadala ang mga tulisan.

Ang liog sa biktima milagom nga gituohang agi sa pagtuok hangtod nga namatay, ipaubos pa sa awtopsiya ang patay’ng lawas sa biktima aron masuta ang hinungdan sa kamatayon niini. – BANAT NEWS