Kapolisan andam na sa election

CEBU, Philippines - Ang kapolisan sa dakbayan sa Talisay nangandam na sa ilang mga angayang buhaton sa umaabot nga eleksiyon karong Mayo 10, 2010 aron mamintenar ang kahapsay ug kalinaw sa tibuok dakbayan.

Ang officer-in-charge sa Talisay City Police Station nga si Superintendent Elmer Lim mibutyag sa Banat News kagahapon nga ang matag polling center sa siyudad destinohan niya og duha ngadto sa tulo ka mga polis ug anaa pay ireserba nga laing polis.

Gawas sa area security sa mga polling center ang mga opisyal sa kabarangayan gihangyo usab ni Lim nga magbutang og mga public assistance center sa tanang sentrong botohanan.

Ang mga public assistance center dumalahon gihapon sa mga polis, tanod ug uban pang mga civilian volunteer.

Matud ni Lim nga magtukod usab sila og “reaction team” nga idestino sa mga barangay Poblacion, Cansojong, Tanke, San Roque, San Isidro, Tabunok ug Bulacao nga gilista nilang sector l.

Ang sektor 2 naglangkub sa mga barangay sa Biasong, Pooc, Mohon, Linao, Lawaan I, II ug III ug Maghaway.

Ang kapolisan sa maong mga sektor kompleto og kahimanan sama sa mga sakyanan nga mag-estambay aron makaresponde dayon sila kun adunay kagubot nga mahitabo.

Midugang siya nga dili kaayo problema ang Talisay kay wala kini record nga may kagubot nga nahitabo sa mga milabay nga election.  (BANATNEWS)