Mipalit og p5m gold bar giunay'g tulis sa kasabot

CEBU, Philippines - Singko milyones pesos ang nasakiyo gikan sa usa ka negosyante ug mamalitay og gold bar dihang giunay og tulis sa iyang katransaksyon sulod sa usa ka iladong fastfood sa Poblacion siyudad sa Bogo niadtong Miyerkules sa alas 2:00 sa hapon.

Ang biktima mao si Romeo Batobalonos Villarosa Jr., 31, molupyo sa Villa Del Rio, Mactan Lapulapu City ug mamalitay og gold bar.

Samtang ang gitumbok nga suspek mao si Alfredo Caling, lumad nga taga Biliran, Samar ug ang kauban niining si Rolando Costanos, molupyo sa barangay Udlot siyudad sa Bogo.

Matud pa ni Supt. Julian Entoma, hepe sa Bogo City Police dihang nahinabi sa Banat News gikaabot sa biktima ang mga suspek sa siyudad sa Sugbo niadtong petsa 5 ning buwana tungod sa gi-deal nga gold bar.

Si Villarosa ug ang mga suspek nagkasabot nga ipa-examine una kini sa goldsmith sa Manila aron pagtino kun tinuod ba kini og dili peke, tuod man migawas nga dili peke ang maong bulawan ug namalit sila sa Sugbu.

Nagkasabot silang magkita sa maong fastfood chain sa Bogo alang sa binayranay sa kantidad nga P5 milyones.

Human sa ilang pagpangaon nanakay sila sa iyang pickup ug nangita og dapit diin sila magbinayranay apan pag-abot sa usa ka mingaw nga dapit kalit siyang gitiunan og armas ni Caling sa liog ug mideklarar og tulis.

Tungod sa iyang kahadlok napugos siya og hatag sa iyang cash nga P5 milyones  ingon man cellphone ug gidala og balik sa mga suspek ang gold bar nga iyahang paliton.

Ang mga suspek daling mibalhin sa tulo ka motorsiklong nagsunod-sunod kanila ug miikyas padulong sa barangay Lapaz. Ang kapolisan padayon pang nag-imbestigar sa maong hitabo ug pagpangita sa mga suspek. (BANATNEWS)