Mayor Reluya gireklamo tungod sa tigbakayan

CEBU, Philippines - Gipasakaan og kaso ang mayor sa lungsod sa San Fernando diha sa Ombudsman for the Visayas tungod lamang sa pagpahigayon og tigbakay atol sa Semana Santa.

Ang ABC president sa lungsod sa San Fernando, Tinubdan Barangay kapitan Remigio Alicaway mipasaka og upat ka kasong kalapasan sa Municipal Ordinance nga nag-regulate sa pagpahigayon og tigbakay, kalapasan sa Anti-Graft and Corrupt Practices Act, Falsification of Public Documents ug Grave Abuse of Authority and Grave Misconduct batok ni San Fernando Mayor Lakambini Reluya.

Matud pa ni Alicaway sa iyang upat ka pahina nga affidavit of complaint ngadto sa buhatan sa Visayas Ombudsman si Mayor Reluya miisyu og permit alang sa pagpahigayon og tigbakay sa Abril 1 hangtud sa Abril 4 ngadto sa ilang barangay bisan pa man og Semana Santa.

Sumala pa niini walay resolusyon gikan sa barangay officials nga nagtugot sa maong kalihukan nga gipasiugdahan ni Candido Pacquiao, usa sa mga political leader sa mayor.

Si Alicaway miingon nga iyang gipahunong ang tigbakay niadtong Abril 1 apan gipakitaan siya og permisong pinirmahan sa mayor ug may Official Receipt nga giisyu niadtong Marso 31, 2010, mao gihapon sa Abril 2,3 ug 4 nga mayor's permit ug OR sa maong kalihukan apan managsama ra ang OR number.

Gitataw ni Alicaway nga walay sagol pamolitika ang iyang pagpasaka og kaso batok sa mayor bisan adto siya suporta sa kaatbang sa politika ni Reluya nga si Antonio Canoy.

Ang bana ni Mayor Reluya ug consultant sa naulahi nga si Ricardo Reluya mitug-an sa Banat News nga simpleng political harassment ang gibuhat ni Alicaway.

Matud pa niini paabuton nila ang aksyon sa Ombudsman ug ilaha kining tubagon. Sumala pa niya tungod kay walay makitang isyu batok sa iyang asawa ang mga kaatbang bisan unsa nalay gibuhat sa ilang mga kaatbang aron sila dauton.

Mibahad siyang ilahang kasuhan ang mga kaatbang nga miguba sa ilang pangalan karong matapos na ang piniliay lakip na ang mga tawong nagpagamit sa mga kaatbang. (BANATNEWS)