CEBU, Philippines - Midangop sa Waterfront Police Station ang sakop sa Commission on Elections kini human gikatahong gisumbag sa usa ka polis nga nadestino sa National Police Commission (NAPOLCOM)
Si Robert Gasola, taga barangay Quiot-Pardo mireklamong gisukmag ni PO2 Armando Parot pasado alas-11 sa buntag samtang nanangtang sila og mga illegal nga posters sa dalan MJ Cuenco sa barangay San Roque.
Matud pa niini miagi ang polis ug gisitar sila niini apan wala niya damhang sukmagon siya og kalit sa maong polis tungod lang sa rason nga nasuko kini sa ilang gibuhat (pagpanangtang sa posters).
Tungod niini ilaha kining gisumbong ngadto sa Waterfront Police Station. Apan kagahapon sa hapon, si Parot midangop usab sa maong police station ug misumbong nga natagakan siya og stick gikan sa gitangtang nga mga posters.
Gihimakak usab ni Parot nga gisukmag niya si Gasola kay ang nahitabo nagkakonprontase lamang sila ug dihang iyaha untang dad-on sa police station gitambagan siya sa iyang labaw nga si Regional director Atty. Homer Mariano Cabaral nga palahuson nalang siya sa ilang buhatan(Napolcom).
Sa pakighinabi sa mga tigbalita, si Cabaral nagkanayon base sa gitug-an ni Parot kaniya natagakan kini og stick samtang nagmotor hinungdan nga iyaha kining gihunongan ug giingnan og “Paghinay mo uy kay makaigo mo og tawo.”
Matud pang Cabaral nga posibleng nangatandog ang mga garbo sa duha maong nagkalalis. (BANATNEWS)