Balay sa bogo girakrakan, CPPO nagduda

CEBU, Philippines - Sa ikaupat nga higayon lain na usab nga panimalay sa syudad sa Bogo ang gipaulanan og bala sa wala pa mailhing tawo pasado alas-12 sa kaadlawon sa miaging adlaw sa sitio Dawis barangay Ban-ban sa nahisgutang syudad.

Ang chief tanod sa barangay Ban-ban nga si Tarciso Pepito midangop sa kapolisan human ang iyang panimalay gikatahong gipaulanan ug swerteng wala’y bisan usa sa iyang mga kabanay ang naigo.

Nasayran nga adunay nanuktok sa ilang balay ug nagpailang iyang anak apan wala niya kini ablihi tungod kay wala siya makaila sa tingog niini.

Apan pipila ka minuto ang milabay nagpaka-paka dayon ang buto sa armas gikan sa ilang gawas ug nangabuak ang ilang bildo nga bintana ug nabuslot usab ang ilang pultahan.

Ang mga imbestigador nakakuha og usa ka magazine sa kalibre .45 nga adunay buhing bala, mga kabhang sa .9mm pistol ug mga deformed slugs sa wala pa matinong klase sa bala.

Tungod sa maong panghitabo si Sr. Supt. Erson Digal sa Cebu Provincial Police Office mimando sa hepe sa syudad sa Bogo nga mopahigayon og halawom nga imbestigasyon.

Kini tungod kay nagduda si Digal sa mga impormasyong iyang nadawat nga daw ‘rakrak me’ ang nahitabo tungod kay sa maka-upat na ka higayon nga nahitabo ang pagpangrakrak sa maong dakbayan nga puro-parehas og sirkumstansya.

Nagduda si Digal nga daw usa kini ka taktika sa politika kini aron ang ilang lugar ug ang mga kandidato hisgutan sa katawhan.Kahinumduman nga ang mga Martinez naghingusog nga ipailawom sa Comelec control ang 4th District gumikan sa kabalaka sa seguridad sa umaabot nga piniliay.

Mibutyag usab si Digal nga hasta ang gobernador Gwendolyn Garcia nabalaka na sa maong hitabo kini human mitawag ang gobernadora kaniya nga sa ilang impormasyong nadawat adunay namatay sa maong pagpangrakrak.

Hinungdan nga iyang gimando-an ang labaw sa regional mobile group (RMG) nga nadestino sa syudad sa Bogo nga si Insp. Ariel Arellano nga magbutang og base patrol sa nahisgutang barangay kini aron mabantayan.

Kahinumduman nga niadtong Abril 6 sa kaadlawon ang panimalay sa barangay treasurer sa barangay Malingin syudad sa Bogo gipaulanan usab og bala samtang misunod niini niadtong Abril 13 nga nahitabo ang pagpangrakrak sa usa ka panimalay nga political leader nga milansar pagkamayor sa lungsod sa Tabuelan samtang laing panimalay usab sa usa ka ordinaryong tawo ang gipa-ulanan og bala. (BANATNEWS)