CEBU, Philippines - Taas nga taytayan nga magsumpay sa lungsod sa Cordova ug South Road Properties sa dakbayan sa Sugbo gitinguha nga tukoron ni Luigi Quisumbing kun mapili pagka-kongresista sa ika-unom nga distrito sa lalawigan sa Sugbo.
Atol sa tigum kagahapon sa Regency Crest sa barangay Banilad nga nag-ulohan “Consultation with the Business Community” nga gitambongan sa mga inilang magpapatigayon sa Metro Cebu, ilabi na sa Mandaue, si Quisumbing mipasabot sa iyang katuyoan pagdagan pagka-kongresista.
Gipasabot sa apo sa magpapatigayong si Norberto Quisumbing Jr. nga ang kabag-ohan sa politika ang labing una niyang tuyo pag-apil sa politika.
Apan matud niya nga ang iyang mga legislative agenda nagtumong sa pagpalambo sa ika-unom nga distrito, ilabi na ang Mandaue aron mahimo kining “business-friendly” nga lugar.
Nakita ni Quisumbing nga ang trapiko maoy dakong problemang giatubang sa Mandaue, ug ang giplano niyang Cordova-SRP bridge maoy makasulbad niini.
Gihulagway ni Quisumbing nga mao unya kini ang labing mubong rota paingon sa Mactan Cebu International Airport gikan sa siyudad sa Sugbo.
Plano usab niya nga matukod ang Consolacion-Lapulapu bridge aron ang mga magpapatigayon sa amihanan mahimo nang makaagi sa Lapulapu lahos sa Cordova kun mopaingon sa siyudad sa Sugbo ug sa amihanang bahin sa lalawigan.
Laing plano niini mao ang pagpalambo sa health care benefits ug educational program sa mga kabus nga mga residente sa distrito. (BANATNEWS)