Ginikanan sa atleta mireklamo

CEBU, Philippines - Gipatin-aw sa usa ka ginikanan sa atleta sa delegasyon sa dakbayan sa Mandaue sa milabay’ng sangka sa Central Visayas Regional Athletic Association (CVIRAA) didto sa siyudad sa Danao sa miaging Pebrero nga hangtud karon wala pa gyud madawat ang allowance sa mga atleta gikan sa   kagamhanan sa Mandaue.

Si Yvette Lee may anak nga tinun-an sa Sacred Heart School sa Canduman, sa maong dakbayan ug usa sa mga athlete sa Mandaue sa long jump competition sa milabayng CVIRAA meet.

Gibutyag ni Mrs. Lee nga gipublikar niya ang maong panghitabo sa pagduda nga basin nabulsa na ang maong allowance nga alang sa 425 ka mga atleta sa delegasyon sa Mandaue.

Matud niya nga “nagsige mi og follow up niini, ang amo lang unta nga og what is intended for the children ihatag gyud unta,” dugang pahayag ni Lee.

Ang matag atleta sa Mandaue sa maong sangka gigahinan og tag P800 mil alang sa training allowance ug allowance sa mga atleta atol sa usa ka semana nga kompetisyon.

Midugang ni Mrs. Lee nga una nilang giduol si bise mayor Carlo Fortuna aron magpakisayod bahin sa kalangay sa pagpagawas   sa maong allowance apan nasuta nila nga walay labot ang konseho niini human sila pasabta sa bise mayor nga ang gahin diay niini tua kuhaa sa pundo sa Special Education Fund (SEF) kansang chairman sa local school board mao si Mayor Jonas Cortes. (BANATNEWS)