30 mil mitambong sa rally sa NP

CEBU, Philippines - Gihulagway nga labing dakong rally sa kasaysayan sa politika sa nasud ang proclamation rally sa Nacionalista party ni Sen. Manny Villar sa dakong luna sa pamilyang Ouano sa barangay Opao niadtong Martes sa gabii nga gitambongan og gibanabanang 30,000 ka mga supporters.

Ang kapolisan nahingangha sa kadaghan sa mga supporters nga mitambong nga matud pa mi-awas sa 25 mil ka mga bangko nga giandam ni kanhi Mayor Thadeo Ouano. Didto sa rally ang nagkadaiyang maglilingaw.

Gitambongan ang maong rally sa kandidato pagka-mayor sa Mandaue ubos sa NP nga si Kongresista Nerissa Soon-Ruiz, Bise Mayor Carlo Pontico Fortuna ug si Ouano nga kandidato usab sa pagka-bokal sa ika-unom nga distrito.

Didto usab ang ubang mga kandidato sa NP sa Consolacion ug Lapulapu.

Si Soon-Ruiz atol sa iyang pamulong mipasabot sa iyang pagtapon gikan sa Lakas-Kampi-CMD nga hukom sa kinatibuk-an niyang mga kaubanan sa Nagkahiusang Mandauehanon.

Sumala pa sa kongresista nga makadaghan nang higayon nga dili na siya konsultahon ug pahibaw-on sa mga tigum ug kalihukan sa Lakas-Kampi-CMD bisan opisyal siya niini.

Nagtuo kini nga mas makahatag og dakong kaayuhan ug mga mehoras sa Mandaue ang pagtapon niya kang Villar.

Gibali hinuon ni Soon-Ruiz og saway ang iyang kaatbang nga si Mayor Jonas Cortes nga maoy balimbing tungod kay mipasilong kini kaniadto sa mga Ouano, apan mitraydor pinaagi sa pagpakigsakbang kang Jonkie, anak ni kanhi Mayor Thadeo Ouano, niadtong 2007 election.

Dugang pa ni Soon-Ruiz nga mipasilong usab si Cortes sa landong ni Luigi Quisumbing niadtong miaging eleksiyon, apan naneguro lamang kining modaog hinungdan sa pagkaparot ni Luigi.

Gipasabot hinuon niya nga dili kuwarta ang hinungdan sa iyang pagbiya.

Si Bise Mayor Fortuna sa iyang bahin mipasabot nga ang kapalpakan sa administrasyon ni Cortes gipasangil na ngadto sa konseho.

Si Fortuna ug Ruiz mipasabot nga P2.8 bilyones ang kinatibuk-ang gahin nga gipasar sa konseho sulod sa tulo ka tuig nga pamunoan ni Cortes nga walay “cut” nga gihimo.

Apan matud nila nga bisan sa maong dakong kantidad, ang mga karsada sa Mandaue nabulit gihapon sa mga libaong, nagkalapad ang mga barangay nga gibahaan nga walay undang-undang, wala gihapon maablihi ang ihawan ug wala gihapon mahuman ang merkado.

Si Villar sa iyang pamulong padayong mipasabot nga ang paghunong sa kalisud sa nasud maoy tumong sa iyang pagdagan pagka-presidente. 

Sa Talisay, gihimo ang rally sa parkingan sa mga traysikol sa Tabunok. Gidugok kini tungod sa taho nga adunay mga artista.

Apan si Talisay city administrator Richel Bacaltos nagkanayon nga si Randy Santiago ang nakit-ang mi-uban sa grupo ni Villar apan wala mogawas sa sakyanan tungod sa kahuot sa mga supporters.

Si Supt. Elmer Lim, OIC chief sa Talisay City Police Station, nagkanayon nga gibanabanang 10,000 ka mga tawo ang nanambong sa NP rally sa Talisay. (Cerie Gamboa) (BANATNEWS)