Apo sa mayor nakadasmag 1 patay

CEBU, Philippines - Patay ang usa ka drayber sa traysikad human kini madam-agi sa usa ka sports car nga gimaneho sa apo sa mayor sa lungsod sa Carmen kagahapon sa buntag diha sa Dawis Norte, lungsod sa Carmen.

Ang namatay mao si Edgar Basaka, taga Cogon A, sa nahisgutang lungsod, samtang ang nangaangol mao ang pasahero sa multicab nga sila si Sergio Matabirot, 22.

Ang gitumbok nga nakadasmag kanila mao si Kevin Adrian Pua, 21, apo sa kasamtangang Mayor Sonia Pua sa maong lungsod.

Atol sa pakighinabi sa Banat News kang SPO1 Ricardo Enriquez, traffic investigator padulong sa amihanang bahin ang maong sports car ug ang multicab padulong sa Danao.

Matud pang Enriquez kusog ang dagan sa sports car ug nawad-an og kontrol si Pua ug naatlan usab nga maoy pag-left turn sa traysikad hinungdan nga napunggit kini.

Tungod sa kakusog sa pagbangga nalagpot ang traysikad padulong sa multicab nga giluwanan ni Matabirot, ang multicab mitakilid diha sa dalan samtang katunga sa sports car gikatahong nasunog ug nagusbat og maayo ang traysikad.

Si Pua daling gidala sa hospital tungod sa naangkong samad sa agtang human maigo sa nabuak nga bildo sa iyang sakyanan.

Gidala sa Danao District Hospital ang upat ka pasahero sa traysikad kansang mga pangalan wala pa mailhi sa kapolisan atol ning pagsulat sa balita tungod sa mga bun-og.

Si Basaka gidala unta sa Danao District Hospital apan wala kini magdugay ug nakabsan sa iyang kinabuhi. (BANATNEWS)