Noynoy ug Mar nag-una gyud

CEBU, Philippines - Taliwala sa mga pagdaot ug pagsabwag og mga black propaganda batok kang LP standard bearer Benigno “Noynoy” Aquino III ug sa iyang kandidato sa pagka-bise presidente nga si Senador Mar Roxas, misamot paglipang ang iyang mga dumadapig nga nagtimaan nga mao na kini ang tinuod nga mahitabo sa adlaw sa piniliay karong Mayo.

Kini nasuta sa labing awahing survey nga gikan niadtong Marso 21-28 diin sa 3,000 ka mga tawo nga gipangutana kun kinsay pilion nilang kandidato sa pagka presidente sa nasud, ang gihugopan nilang tanan walay lain mao si Senador Noynoy.

Bahin sa bise presidente, si Senador Roxas usab maoy ilang labing paborito sa tanan samtang ang ilang mga kaatbang sa maong mga posisyon nagpabiling nangikog ug wala nay purohan nga makaapas pa sa ilang rating hangtod sa adlaw sa election.

Sumala sa kadagkoan sa LP nga ang pagpabilin nga numero uno nila ni Noynoy ug Mar sa tanang mga survey sukad pa sa sinugdan nagtimaan nga sila na ang moguwang mananaog sa umaabot nga piniliay.

Kun mahitabo man ugaling nga may magmilagrong laing kandidato nga mokalit lang og labaw sa mga botos nga makuha sa kandidato sa pagka-presidente ug bise presidente sa LP, magkahulogan kini nga may nagpahipi nga pangutana kung ngano.

Ang tanang resulta sa survey dili na matuis ug dili malalis ang kamatuoran nga magpadayon na ang maong sumbanan hangtod na sa adlaw sa election sa Mayo 10. (BANATNEWS)