Palcuto: Unahon ang kalinaw

CEBU, Philippines - Gisaway ni vice mayoralty independent candidate Rico Palcuto ang mga opisyal sa dakbayan sa Sugbo tungod sa dili maayong pagdumala niini ilabina ang kahusay ug kalinaw sa dakbayan sa Sugbo nunot sa mga krimeng nanghitabo.

Kini maoy nag-unang hinungdan nga naaghat siya pagsalmot sa umaabot bugnong lugaynon tungod kay tumong ug tuyo niya nga makatabang pagsulbad sa mga kriminalidad aron mapatunhay og balik ang tinuoray’ng kahusay ug kalinaw sa dakbayan.

Gipasabot ni Palcuto sa mga molupyo atol sa iyang gipahigayong mga pulong-pulong sa kabarangayan matag gabii nga dili gyud molambo ang usa ka lugar o siyudad kun pabiling gihulga sa mga motumaw nga krimen tungod kay wala usay mga negosyante ang ganahan nga mobubo og puhonan sa maong dapit.

Si Palcuto usa ka retiradong koronel sa kapolisan sulod sa 20 ka tuig mipasalig sa pagpatuman sa balaod sa walay pagpinig ug pagpabor sa higayon nga buligan ug makalingkod sa City Hall.

Dugang niya nga nabalaka siya sa seguridad ilabi na sa mga batan-on nga maoy sagad mabiktima.

Miingon siya nga ang iyang lapad nga kasinatian sa pagpatuman sa balaod maoy iyang hinagiban aron mabalik ang tiunay nga kahusay ug kalinaw sa dakbayan. (BANATNEWS)