Kandidato nanagpa

CEBU, Philippines - Kandidato sa pagkakongresista sa 6th District ug igsuon ni Mandaue City Mayor Jonas Cortes gipasanginlang nanghasi ug ang kauban niini misagpa sa mga supporters ni kanhi Provincial Board Member ug 6th district congressional aspirant Luigi Quisumbing.

Ang gireklamo mao si congressional aspirant Ariston ‘Baludong’ Cortes niadtong Sabado sa hapon sa Albaño Road, Bakilid, Mandaue city.

 Ang mga biktima midangop sa Police Station 2 sa dakbayan sa Mandaue ug giila ni Chief Insp. Edilberto Gallego Castañeda nga sila si Nhoe Endrina, 27, Ramonito Echavez, 39, ug Elyzar Noble, 30, pulos mga residente sa Villanueva Compound, Tipolo, Mandaue City ug pulos mga supporters ni Quisumbing.

 Matud pa ni Castañeda nga ang gitumbok sa tulo ka mga biktima nga nihulga kanila mao si Ariston “Balodong” Cortes ug ang laing kauban niining motorista.

Sigon pa sa reklamo nila ni Endrina, Enchavez ug Noble nga mga alas 3:00 sa hapon niadtong adlaw’ng Sabado diha sila sa sitio Albaño Road, barangay Bakilid siyudad sa Mandaue nagpapilit og posters ni Quisumbing.

 Matud pa sa mga biktima nga kalit lamang mihunong ang motorsiklo nga gimaneho ni Cortes ug mihulga kanila bisan og wala silay nahimong dautan batok niini.

 “Kamong supporters birahan tamo unya kay kaila mi ninyo tanan,” sumala pa sa giingong ilang nadungog gikan ni Cortes hinungdan nga wala sila makatingog.

Gikatahong kalit lang nga ang kauban ni Cortes nga gibana-banang 30 ngadto sa 35 anyos, 5'5" ang gitas-on ug kasarangan ang pamanit mikanaog sa motorsiklo ug misagpa kang Endrina.

Human niini daling nanakay sa motorsiklo ug mipasirit sila si Cortes samtang midangop sa kapolisan ug nagpakurasyon si Endrina.

Apan si Balodong dihang gikuhaan og habig mihimakak sa mga pasangil nga nanakit sila og tawo gawas lamang sa pagbadlong kanila.

Matud pa niini gikan siya sa Consolacion rally ug pasado alas-12 sa tungang gabii sila nahiagi sa maong dapit dihang ilang nasigpatan ang mga nag-bonnet nga mga lalaking namilit og campaign posters ni Quisumbing, ang nakaapan gipangsapawan o gitabunan sa mga lalaki ang daan nang mga campaign posters niya ug sa iyang igsuon nga si Mayor Jonas Cortes.

Kini maoy hinungdan nga ilaha kining gihunongan ug gibadlong apan arogante hinuon kaayong nanubag.

 “Binastos nang ila, kabalo kong wala sila sugoa ni Luigi apan naglagot akong mga supporters kay murag mga hawod ang tinubagan,” pagklaro pa niini.

Gihimakak hinuon ni Cortes nga dunay gisagpa ang iyang sakop kondili igo rang natukmod. Matud pa niini daghan sila og ebidensyang mapakita nga gipangsapawan ang ilang mga campaign posters og posters sa kaatbang diha sa Subangdako. (BANATNEWS)