CEBU, Philippines - Usa ka Dutch national ang midangop sa Moalboal Police Station human kini gipanastamasan sa usa ka boatman pasado ala-una sa kaadlawon sa miaging adlaw diha sa White Beach sa barangay Saavedra sa lungsod sa Moalboal.
Si Emi (tinuod pangalan gipugngan), nagpangidaron og 22-anyos ug kasamtangang nagpuyo sa Panagsama Beach Resort sa nahisgutang lugar ang giingong gipahimuslan sa usa ka Gabriel Avenido Aquino.
Si Aquino gikatahong boatman sa Panagsama Beach Resort diin ang biktima mag-check-in ug diin usab gituohang nagkaila ang duha. Ang biktima usa ka bakasyunista sa maong dapit.
Sa pakighinabi sa Banat News kang Sr. Supt. Erson Digal, direktor sa Cebu Provincial Police Office nga gihaylo sa suspek ang biktima nga mag-sight seeing diha sa White Beach Resort.
Tuod man ang biktima wala magdahom nga dunay dautang tuyo kaniya ang suspek mikuyog kini apan dangtan pila ka gutlo kalit lang nga gipanghinol sa suspek ang pribadong bahin sa iyang lawas.
Ang biktima misuway pagwakli sa suspek apan gipugngan hinuon kini sa suspek ug gisugdan og halok ug gibinlan pa kini og ‘tsikinini’ sa liog.
Wala na mohatag pa og dugang detalye si Digal kabahin sa maong hitabo apan sumala pa ni SPO2 Edgar Labi ang deputy police station chief sa Moalboal sa Banat News nga ang imbestigador sa maong kaso nga si PO2 Jennilyn Awe midala sa biktima sa pink room sa Vicente Sotto Memorial Hospital aron matino kun nahilabtan ba gyud ang biktima sa suspek.
Samtang gimandoan ni Digal ang hepe sa Moalboal sa pagpahigayon og hot pursuit operation kini aron masikop na ang suspetsado. (BANATNEWS)