Mi-claim sa death insurance gidakop

CEBU, Philippines - Tulo ka babaye ang na-entrap sa mga sakop sa Criminal Investigation and Detection Group (CIDG) pasado alas-10 sa buntag kagahapon sulod sa Fair Bank syudad sa Danao kini human mi-claim og death loan bisan paman og buhi pa ang tawong insured niini.

Ang gidakop mao sila si Eva Gomez, Remedios Hermoso ug Sevina Barriga pulos taga Danao gidakop nila ni Chief Insp. Rene Kyamko human dunay mireklamo sa head guard sa maong bangko nga kanhi hepe sa syudad sa Bogo nga si Sr. Insp. Arturo Pacifico kabahin sa pagpangilad nga gibuhat sa tulo.

Sa pakighinabi sa Banat News ni Gomez mibutyag kini nga ang ilang silingan nga si Genara “Cita” Montes maoy miagni kaniya sa maong pagpangilad tungod sa pasalig nga P10 mil nga komisyon kun makalusot sa bangko ang ilang claim.

Samtang ang umagad ni Gomez nga si Luciana Gomez, mibutyag nga wala siya masayod sa gibuhat sa iyang umagad nga gipatay na diay siya pinaagi sa paghimo og mini nga death certificate niini. Midugang si Luciana nga wala siya’y planong mopasaka og kaso batok sa tulo.

Sa laing bahin mipasabot si Pacifico, nga ang ilang buhatan adunay Kaabag Program nga life insurance ug bisan si kinsa ang maka-file sa claim basta kompleto ang requirements.

Kasong estafa ug falsification of public document ang ipasaka batok sa tulo. Ipatawag usab ang kapitan nga si Flordilito Almagro sa barangay Guinacot sa syudad sa Danao nga maoy mipirma sa death certificate ni Luciana Gomez ug si Dr. Eric P. Echavez II, medical officer sa syudad sa Danao kini human usab siya miluwat ug death certificate. (BANATNEWS)