Lapok campaign ilusad sa Kusug

CEBU, Philippines - Ilusad karong semanaha ang infomercial sa Kugi Uswag Sugbu (KUSUG) ang Lapok campaign sa South Road Property (SRP) sumala pa ni Cebu City South district congressional aspirant Jonathan Guardo.

Kini ipaagi sa TV advertisement nga titulohan og “Lapok sa SRP” nga mopokus sa paghisgot sa P800 milyones nga balayrunon sa utang sa siyudad matag tuig gikan sa bulsa sa mga Sugboanon.

Matud ni Guardo nga magpakita kini sa mga kapalpakan ni Mayor Tomas Osmeña sa pagdumala sa siyudad, paghatag sa basic services ngadto sa katawhan.

Gikuhaan og sanglitanan ni Guardo mao ang palpak nga pag-atiman sa Cebu City Medical Center, pagkolekta sa basura, problema sa drainage system ug ang kadalanan nga wala maatiman ug tungod kini nga na-divert ang atensyon ngadto sa SRP.

 “My solution to address this mismanagement is to pass a bill creating the SRP Development Authority. This will professionalize the body that will be accountable to run and manage SRP. Like a private corporation,” matud pang Guardo. Gihulagway niini nga dugay kaayo makabawi sa gigasto sa SRP tungod kay sa pagkakaron gisuyop ra kini pagbayad sa utang sa katukoran niini maong hasta ang basic services wala na matagamtami sa mga molupyo.

Apan si Mayor Tomas Osmeña sa press conference diha sa Cebu City Hall misumbalik kang Guardo ug mayoralty candidate Alvin Garcia nga unahon paglimpiyo ang dagway sa ilang mga campaign posters nga gipapilit sa kadalanan sa siyudad.

Giangkon ni Guardo nga dili usa lang ka propaganda ang ilang gihimong Lapok campaign kundili mao kini ang tinuoray’ng nahitabo sa siyudad ubos sa pagdumala ni Osmeña.

Si Garcia sa iyang bahin nagkanayon nga naandan na gyud sa mayor nga dili pagtubag sa isyu inay mamasangil hinuon sa iyang kaatbang.

Si Guardo nidugang nga gawas sa TV Ad makita na usab sa You Tube ug Facebook ang “Lapok campaign.”

Samtang sa pikas bahin nagkanayon si Guardo nga niining nahabiling 20 diyas sa campaign period maayo kaayo ang dagan sa iyang kampanya ug malaumong mapilde niya si Osmeña.   (BANATNEWS)