Tiyan sa sikyu nayabyab

CEBU, Philippines - Nayabyab ang tiyan sa gwardiya dihang gitabangan og dunggab sa duha sa walo ka mga wala mailhing lalaki sa gawas sa gibantayang establisamento sa Pajo, dakbayan sa Lapulapu kagahapon sa kaadlawon.

Ang biktima mao si Eric Bragat, 25, lumad nga taga lungsod sa Sogod ug temporaryong nagpuyo sa Soong I sa nahisgutang dakbayan.

Si SPO2 Rolito Jumao-as, imbestigador sa kapolisan sa homicide section sa kapolisan miingon nga nagbarog ang biktima sa gawas sa JP Complex dihang kalit giduol sa walo ka mga lalaki.

Sa walay igong hinungdan, duha sa grupo ang miduol sa biktima ug gipuli-pulihan og dunggab ang biktima ug daling nanagan palayo sa lugar.

Daling gidala ang biktima sa Vicente Sotto Memorial Medical Center gumikan sa kagrabe sa mga samad niining naangkon diha sa tiyan.

Sa kasamtangan ang kapolisan wala pa makakuha og dugang kasayuran alang sa pag-ila sa mga lalaking mipasipala sa biktima.  (BANATNEWS)