Lapulapu i-Comelec control

CEBU, Philippines - Pormal nang giduso ni Lapulapu City National Peoples Coalition congressional candidate Engr. Joselito Ruiz ang iyang petition ngadto sa Comelec Provincial Registrar nga kinahanglang ipaubos sa Comelec control ang dakbayan sa Lapulapu gumikan sa mga insidente ug krimen nga adunay kalambigitan sa politika.

Ang petisyon gipasaka ni Ruiz niadtong milabay’ng Biyernes ngadto ni Atty. Marco Antonio Castillano sa rason nga dunay mga insidente ug krimeng gihulagway niining may “direct ug indirectly” nga kalambigitan sa politika sa dakbayan.

Base sa maong petisyon ni Ruiz, lakip sa basehanan niini mao ang pag-ambush patay kang Atty. Richard "Dick" Sison sa milabay’ng Marso 21 tuig 2008, pagpatay sa usa ka sakop sa Tau Gamma Phi nga si William, pag-ambush patay kang Allan Berama sa milabay’ng Disyembre 31, 2009 nga mga kanhi kaalyado ni encumbent Lapulapu City Mayor Arturo Radaza.

Gidugang pa niini ang giingong harassments ug pagpang-demolish sa barbeque stand ni Joaquina Borbajo inahan sa ilang kaubang kandidato pagka-konsehal nga si Ruchel Borbajo ug ang pagpasira sa operasyon sa patubig sa barangay Bankal nga gipanag-iya sa ilang kandidato pagka konsehal nga si Cesario Silawan nga walay “due process of law.”

Base sa maong mga hitabo, si Ruiz nagtuong adunay dakong kagubot pa gyud nga mahitabo sa umaabot samtang nagkaduol na ang piniliay ug bugtong makapakgang niini mao ang pagpailawom sa dakbayan sa Comelec control alang sa kahapsay ug seguridad sa mga botante.

Samtang sa kampo ni Radaza, gikataw-an lamang ni Lapulapu City Administrator Teodolo Ybañez ug ABC President , Pajo barangay Kapitan Leo Mercado ang maong pagduda ni Ruiz.

Matud pa ni Ybañez nga walay igong basehanan ang petisyon ni Ruiz gumikan kay ang iyang mga gihimong mga sanglitanan nga mga nahitabo sama sa pag-demolish sa mga barbeque stand, pagpasira sa mga establisamento ug pagputol sa operasyon sa patubig, mga gimbuhaton kini sa usa ka lokal nga kagamhanan tungod sa mga kalapasan sa balaod ug ordinansa ug walay kalambigitan niini ang politika.

Si Mercado sa iyang bahin mipadayag nga ang kamatayon ni Sison, Berame ug ang mga panghitabo sa isla sa Pangan-an sa Isla sa Olango walay bulok politika gumikan kay gawas nga ila ra usab kining mga sakop sa ilang partido mitumaw usab sa imbestigasyon sa kapolisan walay mitumaw nga politically motivated ang nahitabo.

Si Atty. Ferdinand Gujilde ang Comelec Registrar sa dakbayan sa Lapulapu nagkanayon nga gimandoan siya ni Castillano paghatag og rekomendasyon kabahin sa petisyon sulod sa napulo ka adlaw, mao usab niini ang kamandoan diha sa kapolisan.  (BANATNEWS)