12-anyos, tiya nalumos

CEBU, Philippines - Patay nang napalgan ang manag-iyaan nga naglutaw sa usa ka sapa sa milabay’ng adlaw diha sa sitio Camancheles sa barangay Gen. Climaco sa dakbayan sa Toledo niadtong milabay’ng adlaw.

Ang mga namatay nailhan nga sila si Marilyn Lareno Candilada, 21 ug ang pag-umangkon niining si Marialyn Labandero Macapaz, 12, pulos mga residente sa maong dapit.

Sumala pa sa kapolisan ang duha sukad pa niadtong Biyernes sa gabii wala na makauli sa ilang dapit human mobiya sa ilang mga balay niadtong Abril 16 alas-11 sa buntag.

Base sa nakuhang kasayuran sa kapolisan, gikatahong nananghid ang duha sa ilang mga kabanay nga bisitahon ang ilang inahan ug apohan sa bukirang bahin sa maong barangay.

Matud pang SPO3 Carmelito Hornales sa Toledo Police Station, nagpunay ang pagbunok sa uwan niadtong tungura ilabi na diha sa bukid, ang duha gikinahanglang motabok sa usa ka sapa padulong sa balay sa inahan ni Candilada.

Sumala pang Hornales wala pa nila maestablisar kun ang duha aksidenteng nalumos sa pagtaas sa tubig sa sapa tungod sa ulan o ba kaha nangaligo sila sa lugar ug nangalumos.

Gikatahong napalgan ang patay’ng lawas sa duha sa lawom nga bahin sa maong sapa dihang nasigpatan sa mga silingan.

Dugang pa niya, tungod sa kainit sa panahon ubay-ubay gyud sa mga molupyo sa maong dapit ang mangaligo sa maong sapa bisan pa man og may mga parte niini nga lawom ang tubig.

Ang kapolisan sa maong syudad misugyot sa pamilya sa mga biktima nga ipa-awtopsiya ang lawas sa duha aron pagtino sa hinungdan sa ilang kamatayon. – BANAT NEWS