Sobrang gamit og drugas naghikog

CEBU, Philippines - Usa ka 36 anyos nga amahan, kinsa gituohang nasobrahan na sa paggamit og ilegal nga drugas nakabsan sa kinabuhi human kini maghikog sa sulod sa ilang balay sa Purok 5, barangay Nangka, lungsod sa Consolacion sa miaging hapon.

Ang naabtan sa iyang anak nga nagbitay sa ilang sagbayan nga hiniktan og pisi ang liog ug patay na mao si Jose Praun Jr., 36 , ug molupyo sa maong lugar.

Sumala sa kapolisan nga si Christian, 12, nga anak sa naghikog nakurat dihang sa pagsulod niya sa lawak sa iyang amahan, nagdiwalwal na ang dila niini kay maayong pagkatuok sa liog pinaagi sa tumoy sa pising nylon kansang pikas tumoy didto igaid sa sagbayan sa ilang balay.

Nakasinggit og panabang ang bata sa ilang mga silingan ug gihatod dayon kini ngadto sa Mandaue District Hospital apan gideklarar kining dead on arrival sa mga doctor.

 Si Angeli nga maoy asawa ni Jose mibutyag sa kapolisan nga kadaghan na siya makadungog nga magpunay og pasumbingay ang iyang bana nga magtubok sa iyang kaugalingon.

Apan wala lang kini panumbalinga niya kay nagtuo siya nga nagkomedya lamang ang iyang bana.

Midugang si Angeli nga nagtuo siya nga usa sa nakapahasol pag-ayo sa kinabuhi sa iyang bana hinungdan nga nagpakamatay kini mao ang naghinobra nga paggamit niini sa ginadiling drugas.

Wala usab siya magduda nga may laing tawo nga mituyo sa pagtuok sa iyang bana. (BANATNEWS)