'Binayranay' Sa Lapu' Bantayan Sa LP

CEBU, Philippines - Panid-an nalang sa Liberal Party sa dakbayan sa Lapulapu ang posibleng dapit diin magbinayranay ang kampo ni Mayor Arturo Radaza ug botanteng naghupot og illegal nga kodigong dunay buslot nga tumong sa mga pangalan sa kandidato sa Deretso 3.

Kini maoy giluwatang pamahayag ni Atty. Eugene Espidido kandidato pagka-kongresista sa LP sa dakbayan sa Lapulapu ug Efrain Pelaez ang kandidato pagka-mayor sa maong dakbayan.

Ang LP dismayadong wala mahatagi og prayoridad ang ilang reklamo nga gipaabot ngadto sa Comelec Office sa rehiyonal nga buhatan ug ngadto sa Comelec En banc gumikan sa kahamubo nalang sa nahabiling panahon.

Sayod silang daan nga gamay nalang ang panahon nga kini matagad sa Comelec ang ilang reklamo hinungdan nga kung ugaling mapakyas sila sa ilang tinguha sa pagpakgang sa ilegal nga paagi pagdani og botante sa kampo ni Radaza wala silay laing alternatibo gawas sa pagpaniid sa mga dapit kung asa nila himuon ang binayranay.

Dako sila og purohang makapasaka og protesta ilabi na kung adunay ebidensiya sa pagpamalit og botos sa kampo ni Radaza.

Matud pa ni Atty. Ben Militar, Atty. Manuel Monzon ug Atty. Frank Malilong ang mga abogado sa LP nga dakong insulto sa mga Oponganons ang maong paagi tungod kay daw wala na sila’y kagawasan nga makapili og ilang kandidato.

Dili lamang ang lokal nga kandidato sa LP ang naapektahan niini kundili lakip na usab ang national hinungdan dako ang pagtuo nilang kinahanglang tagdon sa Comelec ang reklamo.

Samtang sa iyang bahin, igo lamang nga mikatawa si Paz Radaza, ang kandidato pagka-mayor sa Lakas Kampi-CMD sa mga kabalaka sa ilang mga kaatbang.

Matud pa ni Radaza igo na kanilang adunay mga opisyal sa Comelec nga gikuhaan og pamahayag sa media kalabot sa ilang gihimong pamaagi ug miklarong walay nakitang dautan sa ilang pagbansaybansay sa ilang mga dumadapig atol sa ilang matag gabii nga “voters education” alang sa bag-ong sistema sa piniliay karong tuiga.

Sa maong pamaagi dali ra nga matultulan sa katawhan ang mga kandidato sa Lakas Kampi- CMD sa dakbayan sa Lapulapu ug sa national nga posisyon tungod kay tunong kaayo ang mga buslot sa ilang mga pangalan. (BANATNEWS)