Trabahante sa CYC way apidabit

CEBU, Philippines - Hangtud karon wala gihapon makadawat og reklamo ang Department of Labor and Employment (DOLE)-7 gikan sa mga trabahador sa CYC Construction kalabot sa kaubos sa ilang suwledo.

Ang CYC construction maoy nagtukod sa Gaisano Tisa kansang duha ka firewall nahugno sa miaging semana nga maoy nakaingon sa kamatayon sa lima ka trabahador ug miangol sa laing unom pa.

Si DOLE-7 Regional Director Elias Cayanong mitug-an nga hangtud karon wala gihapon kabuylo ang ilang imbestigasyon pagsusi labot sa pasangil nga wala kahatag og hustong suholan ang CYC sa ilang mga trabahador nga maoy nagtukod sa building sa Gaisano Capital.

Matud ni Cayanong nga wala gyuy mipakita sa ilang buhatan nga mga trabahador bisan paman sa ilang pagbalik-balik og awhag niini nga papirmahon og affidavit aron ilang kasugdan ang imbestigasyon kalabot sa maong kaso. Si director Cayanong wala pa hinuon kawad-i og paglaom nga mopakita gihapon sa ilang buhatan ang maong mga trabahante.

Sa sayo pa mipasangil ang mga trabahante sa maong kompaniya nga wala gyud kuno makaabot sa minimum ang ilang gidawat nga suweldo.

 Ang DOLE-7 daan nang mibahad ngadto sa CYC nga pasakaan nila kini og kaso sa higayong ilang mapamatud-an nga wala kini motuman sa balaod.

Samtang sa pikas bahin gitataw ni Cayanong nga hangtod karon pabilin gihapon nilang gisuspenso ang CYC sa pagpadayon pagtrabaho sa Gaisano Capital diha sa Tisa tungod sa kapakyas niini pagpakita kanila og safety measures aron masiguro na nga luwas ang mga trabahador ug dili na masubli pa ang pagjalusno sa maong building. – BANAT NEWS