Vendors sa Freedom Park mireklamo

CEBU, Philippines - Mireklamo ang mga vendor sa Freedom Park sa dalan Magallanes sa Carbon Public Market ning dakbayan gumikan sa giingong dili patas nga pagtratar kanila sa market authorities may labot sa ilang kapakyas pagkuha og business permits.

Ang mga vendor gipangulohan sa retiradong police nga si Rodulfo Vaño misuwat ngadto kang Konsehal Edgardo Labella ug nangayo og eksplinasyon nganong dunay pipila kanilang napakyas pagkuha og business permits ang gipamulta og P2,500 samtang ang uban P500 lamang.

Ang reklamo ni Vaño gidala ngadto sa committee on markets aron maaksyunan ilabi na nga si Vaño gikatahong mibahad nga kun magpadayon ang dili patas nga pagtagad kanila mapugos ang ilang mga kabanay pag-rebelde.

Dugang pa sa gireklamo ni Vaño ang pagpataas sa city treasurer’s office sa iyang tinuig nga buhis gikan sa P1,225 niadtong 2009 ug gihimo nang P1,531.

“Gibuhat ba kini sa taga City Hall kay aduna sila’y nagpahipi nga plano? Nakapangutana kami niini kay ingon sa tinuyo na man god kini aron mapugos kami pagbakante sa among mga stalls,” sumala pa sa suwat ni Vaño.

Si Konsehal Arsenio Pacaña, vice chairman sa committee on market sa iyang report ngadto sa konseho nagkanayon nga ang pagpahamtang og dili patas nga multa nagdepende kini sa gidak-on sa halin sa matag vendor.

Matud pa nga ang P2,500 nga multa adto ipahamtang sa mga vendor nga mokita og kapin P300 mil matag tuig samtang kadtong gipamulta lamang og P500 adto gipahamtang sa mokita og ubos pa sa P300 mil matag tuig.

Kabahin usab sa pagpasaka sa buhis ni Vaño, si Pacaña nagkanayon nga gibase kini sa pagsaka usab sa halin ni Vaño matag adlaw gikan sa P671.23 ngadto na sa P839.

“The city treasurer’s office finds the 25 percent tax assessment reasonable and the vendors can very well afford to pay on it,” matud pang Pacaña.

Samtang giklaro usab ni Pacaña nga ang pagdemolis sa pipila ka mga stalls gihimo gumikan kay padayon nilang gigamit ang tindahan isip pinuy-anan. – BANAT NEWS