Mireklamo sa picture sa Facebook

CEBU, Philippines - Usa ka 19-anyos nga dalaga ang mireklamo ngadto sa Talisay City Police Station Women and Children Protection Desk niadtong Huwebes sa buntag human niya makita ang iyang hulagway nga gi-upload sa Facebook nga hapit na makita ang pribadong parte sa iyang lawas.

Ang biktima (ngan gipugngan), residente sa Ramona Village, barangay Dumlog, dakbayan sa Talisay mireklamo sa kapolisan ug mipasangil sa usa ka mahuyang nga iyaha rang higala.

Sa gipahigayong imbestigasyon ni PO1 Violeta Godinez, ang dalaga nagkanayon nga ang mahuyang maoy mi-upload sa iyang hulagway diha sa internet, ang nahisgutang hulagway giingong stolen shot sa suspetsado kaniya.

Matud pa niini ang litrato gi-edit ug gihimong halos makita na ang pribadong parte sa iyang lawas dugang pa ang paghimong violet ang kolor sa iyang ngabil ug giusab ang kolor sa iyang panit nga naghitsura siyang minatay.

Sumala pang Godinez ang litrato naghulagway sa dalaga nga naglingkod sa bangko nga nag-shorts og mubo ug blouse, apan daw nabuka ang duha niya ka paa ug nakita ang pribadong parte sa ubos nga bahin sa iyang lawas.

Ang dalaga gibati og kauwaw ug naeskandalo tungod sa pagkapatik sa iyang litrato nga ingon niini ug wala gani ipananghid kaniya.

Sumala pa niya daghang nakakita sa maong litrato nga mga Facebook users mikomento og mga malaw-ay’ng mga pulong nga dili niya madawat hinungdan nga iyaha kining gipang-print ug gidala ngadto sa kapolisan isip ebidensiya.

Ang dalaga mibutyag usab ngadto kang PO1 Godinez nga naputol ang maayo nilang relasyon sa suspek dihang wala siya makahimo sa gihangyo niining load ug ang ikaduha mao nga ang suod nga higalang lalaki sa dalaga naibgan sa suspek.

Ang maong kaso gi-refer una ngadto sa barangay aron ang duha adto una maghusay apan kung makahukom kining mopasaka og kaso ngadto sa piskaliya ilaha kining tabangan ug ang piskalya na maoy motan-aw kun unsay angay nga kaso ang mapasaka batok sa suspek. – BANAT NEWS