Mituok sa amiga gikiha

CEBU, Philippines - Ang kasong murder ang gipasaka sa kapolisan sa dakbayan sa Lapulapu batok sa babayeng mituok hangtud mapatay ang iyang higalang babaye nga nahimong karibal sa langyaw nga uyab.

Si SPO2 Rolito Jumao-as sa homicide section sa kapolisan sa maong dakbayan nga nahinabi sa mga tigbalita miingon nga base sa mga sirkumstansya sa pagkahitabo, planado gyud sa suspetsadong si Geraldine Gilla, 27 nga taga Tabango, Leyte ang pagpatay kang Marilyn Edjao Zacal, 22.

Gisalikway sa kapolisan ang pangangkong self defense ang gihimo ni Gilla tungod sa mga nakita nilang mga ebidensya ingon man sa mga natigom nga mga pamahayag.

Nakuha gikan sa lawak sa panimalay sa suspek ang electrical wire nga gigamit sa pagtuok ug medyas nga giguwantes pa niini paghimo sa maong krimen.

Sa migawas nga autopsy ni Sr. Supt. Nestor Satur, PNP Crime Laboratory maoy migawas nga ang pagtuok sa electrical wire maoy nakaingon sa kamatayon sa biktima.

Samtang ang taxi drayber nga si Jay Blanco ang gipasakaan usab og kasong accomplice to the crime ang ipasaka tungod sa kapakyas niini sa pagtaho dayon sa kapolisan.

Sumala pang Jumao-as daghang police stations nga nalabyan si Blanco sa pagbalik nila sa dakbayan sa Lapulapu gikan gilabay sa suspek ang patay’ng lawas sa dakbayan sa Talisay apan wala gyud kini mosumbong.

Matud pa niining nasayod na dayon si Blanco nga nakapatay ang iyang pasahero apan wala gyud kini makahuna-huna pagtahan sa suspetsado ug misuway pa gani pagsibat dihang pagkakita sa mga polis nga nag-atang sa ilang pagbalik sa panimalay niini sa barangay Buaya. – BANAT NEWS