Mike Rama angayang i-junk ni Tomas- Sonny

CEBU, Philippines - Giawhag ni kanhi senador ug Cebu City mayoral candidate John Henry ‘Sonny’ Osmeña ang ig-agaw nga si Mayor Tomas Osmeña nga i-junk si Vice Mayor Michael Rama sa pagkamayor sa siyudad ubos sa Bando Osmeña Pundok Kauswagan kon BOPK.

Kini tungod sa pag-angkon ni Rama nga may kamatuoran ang pasangil ni Kugi Uswag Sugbu south district congressional aspirant Jonathan ‘Atan’ Guardo nga ang mayor migamit og mga kawani sa city hall alang sa pagpangampanya sa kandidatura niini.

Si Guardo mibahad sayo niining semanaha mosang-at og reklamo batok sa BOPK gumikan sa paggamit sa partido sa mga kawani sa city hall isip speakers ug uban pa sa mga campaign sorties ug pulong-pulong niini nga gidili sa balaod.

Si Sonny Osmeña sa interbyu sa DyRF miklarong walay tulubagon ang usa ka incumbent official kun ang mga empleyado sa gobiyerno sama sa mga drivers ang iyang gamiton “for purposes of utility” tungod kay lahi kini sa partisan activity nga maoy gidili sa balaod.

Matud pa niini kinahanglang pasabton sa mayor ang publiko tungod kay dako kining tulubagon kun maaprubahan ni Guardo.

 “Sama og isda nga nabitik sa iyang kaugalingong baba,” paghulagway pa niini kang Rama. – BANAT NEWS