CEBU, Philippines - Giklaro ni provincial Comelec supervisor Atty. Lionel Marco Castillano nga kabubut-on na sa kandidato kun mopailawom sila sa psychological ug neurological test.
Matud pang Castillano, dili rekisitos sa Comelec sa mga kandidato ang maong eksaminasyon ug kun duna may himuong susama niini wala nay kalabutan niini ang Comelec.
Iyaha hinuon gituuhang estratehiya lamang sa pagpangampanya ang paghinagitay sa mga kandidatu sa ilang mga kaatbang sa politika sa pagpaubos sa klase sa eksaminasyon.
Kahinumdoman, migawas ang isyu sa pagpaubos og psychological ug neurological test sa mga kandidatu human dunay usa ka giingong miyembro sa Nacionalista Party (NP) ni Senador Manuel Villar ang giingong mipagawas og mga dokumentong miagi og psychological stress ang standard bearer sa Liberal Party nga si Benigno “Noynoy” Aquino.
Apan si Aquino sa iyang pagbisita sa miaging adlaw dinhi sa Sugbu misumbalik sa paghagit kang Villar nga mas maayong maoy mouna og pailawom sa maong eksaminasyon. – BANAT NEWS