Radaza nabalaka sa iyang seguridad

CEBU, Philippines - Miangkon si Lapulapu City Mayor Arturo “Boy” Radaza, kandidato sa Lakas Kampi-CMD pagka-kongresista sa lone district sa dakbayan sa Lapulapu nga nabalaka siya sa iyang seguridad maong dili siya kaayo motambong sa mga campaign sorties.

Matud pang Radaza sa press conference human sa rally sa ilang partidong Deretso 3 sa barangay Mactan nabalaka siyang ipapatay samtang mamulong sa iyang campaign sorties.

 Gumikan niini bisan pa nga wala kini sa ubang mga dapit nga bisitahon sa Deretso 3 kampante gihapon siyang botaran sa mga tawo pinaagi sa pagduso kaniya sa mga kapartido. Wala hinuon mobutyag si Radaza kun duna na bay hulga sa kinabuhi nga iyang nadawat gawas lang sa mga timailhang may mga tawong naniid kaniya sa matag tungha niya sa rallies bisan asang dapit sa dakbayan nga naglakip sa mga isla. Tungod niini nabalaka siyang posibleng may planong ipapatay siya sa iyang mga kaatbang. Ang dakbayan sa Lapulapu adunay tulo ka mga lokal nga partidong magsangka karong piniliay sa Mayo. – BANAT NEWS