Gisulod sa maleta

CEBU, Philippines - Usa ka babaye ang napalgang patay ug gisulod sa usa ka maleta diha sa daplin sa dalan sa barangay Linao sa dakbayan sa Talisay kagahapon sa kaadlawon, ang suspek karibal sa biktima sa usa ka Amerkano.

Alas 6:00 sa buntag kagahapon si PO2 Epifanio Comendido Jr. sa homicide section sa Talisay City Police Station miila sa biktima nga si Merelyn Zacal, gibana-banang nagpanuigon sa 23 ngadto sa 30-anyos, lumad nga taga probinsiya sa Camiguin apan nagpuyo sa Island Lodge sa barangay Punta Engaño sa dakbayan sa Lapulapu.

Ang suspetsado mao si Geraldine Gilla, 27, lumad nga taga Tabango, Leyte nagpuyo sa sitio Carmelite, barangay Buaya sa Lapulapu ug giapil usab og sikop ang drayber sa MJ Taxi nga gikargahan sa maletang gisudlan sa biktima nga si Jay Blanco, 36.

Si Comendido sa pakighinabi niini sa Banat News kagahapon mibutyag nga si Zacal ug Gilla ang parehong uyab sa usa ka Amerkano nga si Mark Mosley ug nagsustentuhan sa duha.

Gikatahong si Gilla unom ka tuig nang uyab ni Mosley samtang si Zacal usa ka tuig palang uyab sa nahisgutang langyaw apan gikatahong nagkaproblema ang duha sa bahinay sa sustento gikan sa ilang uyab.

Niadtong Martes sa alas 9:00 sa gabii si Mosley gihatud ni Gilla diha sa Mactan International Airport kay mobalik na kini ngadto sa California USA.

Human mahatud gipadalhan og text ni Gilla si Zacal nga magkita sila diha sa iyang balay sa sitio Buaya ug nagkasabot nga mag-disco sa dakbayan sa Sugbu ug alas-11 na sa gabii nakabalik sa Lapulapu.

Si Zacal giingong nangutana kang Gilla kun pilay sustento ni Mosley kaniya, si Gilla mitug-an nga dihang bag-o pa silang uyab ni Mosley P40 mil ngadto sa P60 mil matag buwan apan niining ulahi P16 mil ngadto sa P20 mil na lang.

Ang biktima giingong nasuko niini tungod kay P4 mil lang ang binuwan nga ipadala kaniya sa langyaw hinungdan nga nahitabo ang ilang panaglalis ug diha-diha mikuha si Gilla og electrical wire ug gigamit sa paghigot sa liog ni Zacal hangtud nga kini namatay.

Human mamatay si Zacal isulod unta kini ni Gilla og drum apan wala kini masulod hinungdan nga sa maleta niya kini gisulod ug gikarga sa taxi ni Blanco ug gidala sa Talisay City aron ilabay.

Si Blanco sa iyang bahin mihimakak nga miapil siya sa pagpatay sa biktima kay matud pa niya igo ra siyang gipara sa suspek ug gipatabang og karga sa maleta diha sa compartment.

Pag-abot diha sa hilit nga dapit gipatabang siya pagdiskarga niini ug nakurat nalang dihang giablihan sa suspek ang maleta ug tawo ang sulod niini.

Gumikan sa kahadlok ug kalibog kun unsay buhaton wala siya mopalag ug mihatud og balik sa suspek ngadto sa barangay Buaya diin sila masikop sa mga polis.

Nasuta nga ang mismong igsuon sa suspek nga si Clifford Gilla, 22, maoy mitaho sa kapolisan sa dakbayan sa Lapulapu sa gibuhat sa maguwang maong pagbalik ni Gilla gidakop kini dayon ug dihang gipasusi sa Lapulapu Police sa Talisay nakit-an ang patay’ng lawas ni Jacal.  - Ug Bong Soriano, Romeo Limpangog ug Cerie Uy Gamboa (BANAT NEWS)