Noynoy-Mar tandem may integridad - Davide Jr.

CEBU, Philippines - Nangangkon ang Liberal Party nga ang ilang kandidato lamang nga sila si Senador Benigno Aquino ug Senador Mar Roxas sa pagkapresidente ug bise presidente maoy dunay dili makwestyong integridad ug haom alang sa gihandom nga kausaban sa nasud.

Sumala pa sa partido kini maoy usa sa rason nga mismong si kanhi chief justice Hilario Davide Jr. misuporta sa partido.

“I think this is the best time for our country to really have a real change and that change can only be accomplished through the leadership of Noynoy and Mar,” matud pang Davide.

Si Cebu City Mayor Tomas Osmeña maoy usa sa mga inilang tawo sa Sugbu lakip sa misuporta sa LP slate, samtang ang anak ni Davide nga si kanhi Cebu City Councilor Hilario “Jun” Davide III maoy gituboy pagka-gobernador dinhi sa lalawigan.

Sa gihimong rally sa LP diha sa Lagtang sa dakbayan sa Talisay usa sa mga supporter nga si Elsie Aquino-Dañucop, 52, sa barangay Apas, Lahug dakbayan sa Sugbo dako ang pagtuong si Aquino lamang maoy makausab sa sistema karon sa nasud.

“Di sad tingali na siya magpakauwaw sa iyang amahan ug inahan uy, kay kadto sila daghan kaayo ‘to silang nahimong kaayohan sa atong nasud, challenge na niya ug daku gyud akong pagtuong iyang mapamatud-an nga siya angayan gyud nga mamahimong usa ka presidente,” ni Dañucop pa.  – BANAT NEWS