Bag-ong Comelec regional director milingkod

CEBU, Philippines - Nagsugod na paglingkod kagahapong adlawa ang bag-ong regional director sa Commission on Elections -7 nga gihulip ni regional director Rene Rey Buac human sa simpleng turnover ceremony niadtong adlaw’ng Lunes.

Si Atty. Dennis Ausen, gikan sa Comelec rehiyon 6 misuroy dayon sa Comelec office sa siyudad sa Sugbu ug sa probinsiya ug nakighimamat sa mga opisyal niini.

Si Buac nagsugod na usab sa iyang bag-ong buhatan sa Comelec-7 sa Ilo-ilo City ang lugar nga gibiyaan ni Ausen.

Sa sayo pa si Buac misalikway sa mga kabalaka sa kinabag-an nga mga botante nga maapektohan ang ilang preparasyon sa umaabot nga automated election karong bulan sa Mayo sanglit maputol man ang momentum sa ilang pagpangandam nunot sa lahugay.

Gipanghimakak usab ni Buac nga politika ang hinungdan sa iyang pagbalhin sa Western Visayas samtang ang iyang assistant regional director nga Atty. Verinico Petalcorin adto sa Eastern Visayas o Region 8.

Dugang pa niini nga dili maglisod si Ausen sa iyang pagdumala sa Central Visayas sanglit iya mang makaabag si Provincial Election Supervisor Atty. Lionel Marco Castillano nga maoy magsilbing assistant regional director niini. - BANAT NEWS