Paz andam moatubang

CEBU, Philippines - Wala mabalaka ang kandidato sa Lakas Kampi- CMD nga si Paz Radaza sa pagpasaka og reklamo sa oposisyon batok kanila ngadto sa buhatan sa Commission on Elections.          

Matud pa ni Radaza wala silay angayang ikahadlok sa gipasakang reklamo nila ni LP Mayoralty candidate Efrain Pelaez ug NPC Mayoralty candidate Junard “Ahong” Chan gumikan kay walay mga kamatuoran ang ilang mga akusasyon.

Ang akusasyon may labot kini sa papel nga duna nay buslot nga kun itupad sa opisyal nga balota, ang mga buslot adto ra gyud motunong sa pangalan sa mga kandidato sa partido nila ni Radaza ug giingong kini maoy ipakita sa botante ngadto sa partido ni Radaza aron pagkuha sa bayad sa ilang botos.

 Matud pa niini nga pag-edukar lamang sa mga botante ang ilang gihimo aron mas matultulan dayon ang mga kandidato sa Deretso 3 (ilang lokal nga partido) diha sa balota, sumala pa niini nga estratehiya lang nila kini ug dili angayang isipong pagpamalit og balota. - BANAT NEWS