Balay girakrakan politika hinungdan

CEBU, Philippines - Kapin pa usa ka bulan ang piniliay nagsugod na ang kainit sa politika diha sa lungsod sa Tabuelan human usa ka political leader sa usa sa mga kandidato pagkamayor mipasangil sa Association of Barangay Captain (ABC) president sa lungsod nga mirakrak sa iyang panimalay niadtong Lunes sa gabii sa barangay Kantubaon.

Si Orlando Mendoyos, giingong political leader ni mayoralty candidate Raul Gerona mireklamo sa kapolisan nga girakrakan ni ABC president Julieto Almonacin, kapitan sa barangay Kantubaon ang ilang balay.

Gikatahong supporter ni mayoralty candidate Rey Casiano Gerona si Almonacin.

Si Cebu Provincial Police Director Erson Digal nagkanayon sa media nga base sa ilang imbestigasyon ‘politically motivated” gyud ang hitabo tungod kay ang biktima ug ang gitumbok nga suspetsado pulos man supporters sa duha ka mayoralty candidates nga managsuon.

Giklaro hinuon ni Digal nga wala pa silay nakuptang ebidensiyang si Almonacin gyud maoy suspek gawas lang sa alegasyon sa biktima.

Nagtinguha ang kapolisan pagpahigayon og covenant forum diha sa Tabuelan uban sa mga sakop sa media, Commission on Elections, Philippine National Police (PNP) ug Armed Forces of the Philippines (AFP).

Kini aron hisgutan ang umaabot eleksyon kun unsaon pagmentenar sa kalinaw ug kahapsay sa maong lungsod.

Samtang irekomendar usab ni Digal nga ang lungsod sa Tabuelan bantayan na sa militar.

Gikatahong may pipila ka mga residente sa nahisgutang barangay ang nakakita ni Almonacin nga nagbitbit og taas nga klase sa armas nga gituohang maoy gigamit sa pagpangrakrak niadtong hitaboa.

 Nasayran usab nga sa wala pa mahitabo ang insidente ang biktima ug si Almonacin nakit-ang nagtinubagay dangtan pipila ka minutos nahitabo na ang pagpangrakrak, wala hinuoy naigo niini.

Nakuha sa panimalay sa biktima mao ang siyam ka kabhang ug upat ka buhing bala sa Carbine rifle.  - BANAT NEWS