Giunay'g dunggab sa amigo

CEBU, Philippines - Naa sa talandugong kahimtang ang usa ka tawo human kini unaya og dunggab ug pusil sa iyang amigo didto sa sitio Intramuros, barangay Poblacion, lungsod sa Cordova sa miaging hapon.

Ang biktima mao si Rey Antona, 30, minyo nga taga sitio Calan, barangay Poblacion, samtang ang suspetsado mao si Florencio Inoc Jr., hingkod ug taga sitio Camolinas, barangay Poblacion sa mao gihapong lungsod,

Matud pa ni SPO1 Larencio Wagwag sa kapolisan sa Cordova nga nag-inom ang duha ka managhigala kauban sa ilang mga barkada, ug dihang nangalasbag na, mitumaw na ang lalis tali sa biktima ug sa suspetsado.

Gumikan niini nakahukom ang biktima nga mopauli sa ilang balay, dihang giatangan siya sa suspetsado ug gipanunggab dayon kini sa kutsilyo .

Wala pa gyud matagbaw, gipusil pa gyud ang biktima ug maayo nalang kay gibinlan pa kini og ginhawa.

Gidala dayon sa tambalanan ang biktima, samtang gipangita pa sa kapolisan ang suspetsado kinsa nakasibat human sa hitabo.   (BANATNEWS)