Disgrasya sa motor 1 patay

CEBU, Philippines - Namatay ang usa sa duha ka tawong nagsakay og motorsiklo dihang nahagbong sa kanal ang ilang sakyanan didto sa national highway sa Sitio Tindahan, barangay Can-asojan, syudad sa Carcar sa milabay'ng kaadlawon. Ang nakabsan sa kinabuhi mao ang drayber nga si Richie Laorden Carbonilla, 22, nga taga Can-asojan, samtang naangol usab ang iyang angkas nga si Jomel Cuizon Cabarrubias nga iyang silingan.

Sumala sa kapolisan nga gikang namiyesta ang duha didto sa balay sa asawa ni Jomel sa barangay Pitalo, lungsod sa San Fernando, ug hubog na kining nagmaneho sa motorsiklo nga mipauli ngadto sa Carcar.

Tungod sa hilabihang kakusog sa pagpadagan sa motorsiklo wala na kini makontrolar sa drayber dihang nagdagan sila sa usa ka kurbadahong dapit ug mideretso kini ngadto sa kanal. Matud pa ni SPO1 Edwardo Bagol, sa Carcar Police Station nga wala magsul-ob og helmet ang mga biktima.

Nasuta usab nila nga napantok ang ulo sa namatay sa punoan sa ipil-ipil sa kilid sa kanal hinungdan nga nalumping ang ulo niini. Gihatod dayon ang mga biktima ngadto sa Carcar District Hospital, apan gideklarar sa mga doctor nga dead on arrival si Richie, samtang si Jomel gipahatod usab ngadto sa Vicente Sotto Memorial Medical Center sa dakbayan sa Sugbo. (BANATNEWS)