Boy Radaza mitambong na og rally

CEBU, Philippines - Gipamatuod ni Mayor Arturo Radaza ang maayong panglawas niini pinaagi sa pagtambong sa ilang rally ug namulong og dugay sa miaging gabii nga sa barangay Agus, dakbayan sa Lapulapu.

Ang unang ginang sa dakbayan nga si Paz Radaza nga kandidato sa pagka-mayor ug kompletong line up sa konseho maoy kauban ni Radaza sa pagpanglamano sa ilang mga dumadapig nga mitambong sa gihimo nilang rally.

Ang mga kaatbang ni Paz mao sila si Konsehal Jonard ‘’Ahong’’ Chan nga maoy standard bearer sa Nationalista Party, Efren Pelaez nga maoy standard bearer sa Liberal Party ug Isabelito Belong Darnayla nga standard bearer sa Partido ng Masa.

Samtang si Radaza nga motapos na sa iyang ikatulong termino ang magpapili sa pagka kongresista sa lone congressional district sa dakbayan sa Lapulapu ug higpit niyang kaatbang sila si kanhi DILG undersecretary Lito Ruiz ug kanhi Konsehal Eugene Espedido.

Si Radaza sa 40 minutos niyang pagpamulong mipasabot nga gipalabi unta niya ang pagpakahilom niining umaabot piniliay sanglit dako man iyang pagtuo nga gisuportahan sa mayoriyang Oponganon.

Gipasabot ni Radaza nga napugos na lamang siya sa paggawas sa lungag nga iyang gitagoan tungod kay ang iyang mga kaatbang sa politika “nagmugna man og daob nga nagpaaso sa iyang nahimutangan.”

Gipanghimakak ni Radaza nga adunay siyay gihambin nga balatian nga maoy hinungdan nga wala na siya makita sa publiko alang sa pagpahigayon sa iyang kampanya.

Sa nasayran sa Banat News nga ang kampo ni Radaza sa unang semana sa pagpangampanya nga nagsugod sa Marso 26 wala mosentro sa pagpahigayon og rally uban sa iyang line up sa Lakas Kampi.

Gihimo sa iyang kampo ang pagtapok sa mga molupyo sa kabarangayan sa dakbayan apan ilang gisentro ang voters education pinaagi sa pagpasabot sa bag-ong pamaagi sa pagbotar nga ginamit ang PCOS machine sa Mayo 10 nga piniliay. (BANATNEWS)