Mandaue hinloan sa basura

CEBU, Philippines - Misaad si Kongresista Nerissa Soon Ruiz nga sulbaron niya ang naghitak nga basura sa Mandaue ug patahumon niya ang maong dakbayan kung mapili siya sa pagka-mayor karong Mayo 10 nga election.

Sa iyang pagtambong sa roundtable discussion sa The Freeman ug Banat News kagahapon , si Ruiz nagkanayon nga gawas sa basura, ang mga nabuslot nga karsada nga wala na magkadimao ug wala matagad sa administrasyon karon, iyang ayuhon.

Bisan ang pag-atiman sa maayong panglawas sa katawhan ug ang edukasyon sa kabataan maoy iyang buot ipatagamtam sa tanang Mandauehanon.

Miingon siya nga giuhaw kaayo ang taga Mandaue sa tukmang pangalagad ug serbisyo nga maoy labing gipaabot sa tanan.

.Gtani midugang siya nga naka desisyon siya nga mokandidato sa pagka mayor sa dakbayan sa Mandaue kay gipul-an siya sa mga trabahuon sa Kongreso ug gusto niyang anhi niya igugol ang taas niyang panahon sa Mandaue.

Matud pa sa Kongresista nga daghan na kaayo siyang natabangan sa Mandaue pinaagi sa paghatag og scholarship, serbisyo medical ug uban pa.

Gani kaliboan na nga mga professional’ ang iyang napahuman og eskuyla og garbo kini para kaniya.

Miingon siya nga malipay kaayo siyang magtan-aw sa mga ginikanan kinsa nalipay nga nakahuman na sa pag-eskuyla ang ilang mga anak.

Naglaraw siya nga mapalapdan pa ang maong matang serbisyo kay wala siya makasabot nganong gihikawan ang Mandauehanon niini nga unta may dako mang budget nga gigahin alang niining mga proyektoha.

Apan naunsang pagkaunsaa nga ang pagpanilhig ra man sa karsada maoy gigastohan sa maong budget.

Nagplano usab siyang magtukod og usa ka health center nga mag-operate 24 oras para mapahimuslan sa mga taga Mandaue ug aron katabangan niya ang mga nurse nga wala pay trabaho hangtod karon.

Usa sa nakita niyang problema sa maong dakbayan mao ang mga basura, mga gubaong karsada , imbornal ug uban pa.

 Bahin sa mga negosyante, naglaraw si Ruiz nga magtukod siya og sistema nga ipaagi na sa modernong makinarya ang pagbayad sa buhis sa mga mamumuhis ilabi na sa mga negosyante pinaagi sa online nga pagbayad aron dili na sila maglisod sa pagbayad sa ilang obligasyon sa gobiyerno.

May plano usab siya nga ang mga batan-on bairon pag-ayo sa pagsulti og eninglis aron nga dali kining makatrabaho sa mga call center. Sa bahin sa mga vendor, si Ruiz miingon nga nakasabot siya sa gibati sa mga tindera nganong dili sila mobalhin ngadto sa bag-ong merkado kay nahadlok silang wala nay mga kustomer nga modugok didto ug langawon lang sila hangtod nga dili mahalin ang ilang mga baligya.

Maoy hinungdan nga ang maong merkado nga gitukod sa unang mga mayor, iya lang himoong opisina sa mga kawani sa gobiyerno sa maong dakbayan ug ihatag ngadto sa mga vendor ang tukmang dapit alang kanila aron nga mabuhi silang malinawon.

Unya alang usab sa mga minatay, magtukod siya og bag-ong menteryo nga alang sa tanang matang sa tawo nga bisan unsay relihiyon makalubong ra ,aron walay magmahay sa iyang pangagamhanan.

Buot niyang ibalik ang garbo sa mga Mandauehanon kay nawala na karon ang culture and art sa Mandaue   ug gusto niyang mapamatud-an nga ang Mandaue usa ka “livable city”.

Nanghinaot siya nga makita ug mahinumdoman sa mga tawo ang iyang maayong gibuhat para kanila.

Ang iyang pagka sincero, daling maduolan og mga tawo, andam siyang motabang ug iyang buhaton ang tanan para sa kaayuhan sa iyang mga anak kay siya usa usab ka inahan.

“I don’t see any reason why people in Mandaue should not vote for me” matud pa niya.