Neuro ug psychotest kinahanglan

CEBU, Philippines - Si Gobernador . Gwen Garcia uyon sa proposal nga tanang mga kandidato mopaubos sa Neuro ug Psychological test sa dili pa kini hingpit nga molingkod sa katungdanan sa gobiyerno.

Matud pa ni Garcia nga wala siya mahadlok ug andam siya nga mopaubos sa maong testing aron masukod unsa siya ka andam ug kahaum nga kandidato alang sa pag-atubang sa  kalapad sa iyang tahas sa pagdumala sa probinsiya sa Sugbo.

Gipasabot sa gobenadora nga samtang didto pa siya sa private business ug wala pa mahimong gobernadora, iyang nasinati ug gipatuman ang kakinahanglanon sa usa ka pribadong kompaniya  ang neuro examination ug psychological test aron makuha ang Executive Quotient ilabina sa usa ka “supervisory position”.

 Suma pa sa gobernadora nga ang trabaho isip usa ka gobernador usa ka “challenging job” ug nagkinahanglan nga makamao kang mohupot sa matag-adlaw nga mga isyu ug halapad nga pagplano alang sa kaugmaon sa lungsod nga gialagaran hinungdan nga angayan nga sukdon ang katakus niini.

 “And so to insure that the people will be able to get a governor, a congressman or a president that can tackle and handle the job psychologically, intellectually and even emotionally,  I do believe that the candidate  must be required to take such test,” sigun pa ni Garcia sa press conference kagahapon.

Gipahibawo sa gobernadora nga sa iyang pagpangatungdanan iyang gidumala ang Kapitolyo isip usa ka enterprise nga nagdemanda og usa ka kalipikadong opisyal alang sa mas epektibong pagpatuman sa programa ug tinuod nga serbisyo ngadto sa mga Sugbuanon.

 Dugang pa sa gobernadora nga wala siyay nakitang babag sa maong lakang aron makabaton usab ang publiko og usa ka leader nga may igong kapasidad sa pagdumala sa gobiyerno ug  dili usab mausik ang kwarta sa kagamhanan. (BANATNEWS)