2 nagpabuto'g armas nasikop

CEBU, Philippines - Duha ka tawo ang nadakpan gumikan sa pagpabuto og armas de fuego nga walay lisensya didto sa sulod sa usa ka KTV bar sa MJ Cuenco Street, barangay Poblacion, lungsod sa Argao.

Ang mga suspetsado mao sila si Jasper Bajenteng, 27, ug Rolando Mamites, 28, pulos minyo, nga pulos usab taga barangay Usmad, sa maong lungsod.

Nasakmit sa kapolisan gikan sa maong mga suspetsado mao ang usa ka improvised weapon o pugakhang uban ang buhing bala niini.

Si PO1 Eduardo Semilla mibutyag sa Banat News nga human nila madawat ang alarma kalabot sa mga tawong armado nga nagpabuto og armas de fuego   sulod sa Bordigos KTV sa MJ Cuenco Street, dihadiha gipatrolyahan dayon nila ang maong lugar.

Apan dihang nakaalinggat ang mga suspetsado nga taliabot ang mga polis misuway sila og pabulhot sa ilang motorsiklo kay buot mosibat   pahilayo sa maong lugar.

Apan abtik kaayo silang gigukod sa kapolisan hangtod nga naapsan sila didto sa Don Gil Garcia Street, barangay Poblacion, Argao.

Matud pa ni Semilla nga gidali-dali og labay ni Mamites ang iyang armas ngadto sa kahumayan busa gipunit dayon kini sa mga otoridad.

Sa pagkakaron nagkagulkol na ang maong mga suspetsado sa prisohan sa kapolisan sa Argao ug kasong illegal possession of firearm ang isang-at batok kanila. – BANAT NEWS