Nag-night swimming namatay

CEBU, Philippines - Usa ka tawo kinsa giingong nag-night swimming ilawom sa Marcelo Fernan Bridge sa barangay Umapad, dakbayan sa Mandaue niadtong Sabado, napalgang patay na kagahapon sa buntag didto sa maong lugar.

Ang nakabsan sa kinabuhi mao si Toto Bengel, 32, ulitawo nga nagpuyo sa barangay Tabok sa nahisgotang dakbayan.

Si Inspector Wilfredo Abot, deputy chief sa Presinto 5 sa Opao Police Station nga nahinabi sa Banat News miingon nga nakig-inom pa ang namatay sa mga barkada nga gikauban niini sa maong dapit sa wala pa kini maligo sa dagat.

Unya human sa ilang inom miadto kini sa dagat ug naligo apan gibadlong kini sa mga kauban kay may barkong nagsingabot sa maong lugar niadtong tungora.

Apan matud pa ni Inspector Abot nga si Bengel, inay nga maminaw sa pagbadlong, misinggit pa hinuon kining nagkanayon matud pa nga “luwasa ko ninyo kun mamatikdan ninyong malumos ko.”

Si Inspector Abot miingon nga base sa gisugilon sa mga kauban sa namatay, nga nakita pa nila si Bengel nga naglangoylangoy hangtod nga kalit lamang kining nawagtang sa maong lugar.

Gipangita kini sa mga kauban, uban sa mga mananagat sa maong dapit ug kagahapon sa buntag na kini hikit-i nga patay na ug naglutaw sa dagat.

Ang patay’ng lawas ni Bengel gipa-autopsy pa sa kapolisan aron pagtino kun wala ba kini patya pagtuyo. – BANAT NEWS