Polis mi-uwang sa kagubot nasamdan

CEBU, Philippines - Nasamdan ang usa ka polis nga misulay og uwang sa kagubot nga nahitabo sa usa ka disko niadtong miaging gabii diin ang mga batan-on naglinabayay og mga botelya ug mga bato.

Laing upat ang nasamdan sa hitabo didto sa barangay Tapul, lungsod sa Tabogon, pasado alas dos sa kaadlawon sa miaging adlaw.

Si SPO2 Leo Hortelano nga residente sa barangay Tapul apan nadestino sa Carbon Police Station nakaangkon og samad sa ulo, samtang lain usab nga samdan mao sila si Rene Pepito Jr., 19, molupyo sa barangay Poblacion, Joseph Book, Harris Malazarte nga mga molupyo sa Piyo, ug Peter Arpon, nga taga Tapul.

Ang mga gitumbok nga hinungdan sa kagubot mao ang grupo nilang Renjie Gino-o, Regner Booc, Victor Sinoy, Dave Monroid, John Rey Gulben, Kenneth Doldol, Polaris Garcia, Junvil Loberanes ug Alfred Maloloy-on nga mga molupyo sa Daantabogon.

Nasayran nga adunay gipahigayon nga disko sa maong lugar atol sa kasaulogan sa kapistahan niadtong Biyernes.

Sa kalit lang mitumaw ang kagubot sa wala mahibaw-i nga hinungdan ug nanglupad ang mga bato ug botelya.

Atol sa kagubot, mipatunga si SPO2 Hortelano apan imbes mopatuo kaniya ang grupo nilang Gino-o, misamot hinuon ang ilang panggubot.

Tungod niini, nasamdan hinuon si SPO2 Hortelano agi sa mga botelya ug bato.

Hinuon, ang siyam nga gitumbok nga nagsugod sa kagubot sa kapistahan sa maong lugar kasamtangan karong nagtingkagol sa karsel sa Tabogon Police Station ug nagpaabot sa tukmang kaso nga ipasaka batok kanila.

Gisuwayan unta pagkuha sa Banat News ang habig ni SPO2 Hortelano, apan ang iyang mga kauban sa buhat wala makahatag og contact number ngadto sa Banat News. – BANAT NEWS