Comelec giawhag merger sa NP-NPC matuoron

CEBU, Philippines - Giawhag sa Liberal Party (LP) ang Commission on Elections (Comelec) nga ipagawas sa dili madugay ang resolusyon nga naglig-on sa coalition sa Nacionalista Party (NP) ug Nationalist People’s Coalition (NPC) sa umaabot nga piniliay karong Mayo 10.

Ang mga abogado sa LP misang-at og mosyon nga nag-awhag sa Comelec nga ipakanaog dayon ang ilang hukom sa giingong merger sa NP ug NPC kay ang pagkalangan sa hukom makapahuyang sa ilang katungod paghimo og tukmanglakang batok niining maong isyu.

Kahinumdoman nga ang LP ni Senador Noynoy Aquino misang-at og mosyon alang sa maong katuyoan sa ikaduha nang higayon ug kini nahitabo niadtong Marso 23 ug 30.

Niadtong Abril 8, mitumaw ang report base sa gipahayag ni Commissioner Lucenito Tagle nga matud pa na-aprobahan na sa Comelec   ang paghiusa sa NP ug NPC.

Giingon nga ang maong resolusyon ipagawas sa sunod semana samtang si Senador Mar Roxas nag-awhag sa Comelec nga kinahanglang mohimo og pormal nga resolusyon sa dili pa himuon nila ang opisyal nga pahibawo ngadto sa publiko.