LP mosuporta sa Kontra Daya

CEBU, Philippines - Ang Liberal Party (LP) andam nga mosalmot sa tibuok nasud nga rali nga pasiugdahan sa Simbahang Katoliko uban sa grupo nga gitawag nga Kontra Daya coalition karong Abril 22 .

Matud pa ni manlalaban Alex Lacson, kandidato pagka-senador sa LP nga andam silang tanang mga opisyal ug miyembro sa maong partido sa pagpakighiusa niini tungod kay timailhan kini nga nagpakabana na ang mga katawhan sa nasud batok sa mga kahiwian sa election.

Midugang siya nga gisuportahan niya ang lakang ni Obispo Ted Bacani ug sa Kontra Daya coalition ug mitabang siya pag-awhag sa kinabag-ang sakop sa relihiyosong pundok nga makighiusa ning maong lakang aron ang mga politiko nga naglaraw nga lawgawon ang umaabot nga piniliay sa Mayo 10, dili makahuygo.

Dili pa dugay si Bacani uban sa Kontra Daya Coalition mipahibawo sa Comelec nga ilusad nila ang tibuok nasud nga rali karong Abril 22, aron ipahibawo nila sa tibuok nasud nga kondinahon nila ang mga politikong tikasan ug walay pagtahod sa kabalaanon sa piniliay.

Matud pa ni Lacson nga ang umaabot nga election sa nasud una sa iyang matang nga gamitan og modernong kahimanan sa piniliay.

Busa nagtuo siya nga angayang mabalaka kadtong mga tawong maldito ug tikasan sa paghimo og lakang nga makapanlupig sa ilang masigka-Pilipino.