Oaminal misaway sa gobiyerno

Si kanhi Dangerous Drug Board Under Secretary Clarence Paul Oaminal misaway sa gobyerno tungod sa dili maayong pagdumala sa reward system alang niadtong mga informant nga makatudlo sa mga nagpaluyo sa pagpayuhot sa ginadiling drugas.

 Suma pa ni Oaminal nga ang reward system nga kaniadto maoy nakatabang sa pagkasikop sa mga dagkong drug pusher sa tibuok nasud, "wala na matarong sa pag-handle sa Philippine Drug Enforcement Agency (PDEA)."

 Kini ang hinungdan nga daghang mga tawo kinsa may kasayoran sa kalihukan sa sindikato sa illegal nga drugas dili na motug-an ngadto sa mga otoridad kay gawas nga risgo ang ilang kinabuhi wala pa gyuy suhol silang madawat.

Matud pa ni Oaminal ang gobyerno wala nay klarong accountability ug wala na usay transparency sa ilang paghatag og reward niadtong maisigon nga informant nga mohatag og impormasyon batok sa mga tigpayuhotan og ginadiling drugas.

 Si Oaminal miingon nga ang iyang nahibaw-an nga nahatagan og P84 mil nga reward money niadto pang tuig 2009 diin siya ang nangusog nga hatagan ang usa ka informant.

 Miingon usab si Oaminal nga nangreklamo usab ang ubang mga testigos sa korte batok sa illegal nga drugas ilabi na kadtong bahin sa shabu laboratory sa dakbayan sa Mandaue kay wala na kahatagi og sustento sa gobyerno.

 Gani ang maong mga testigos   nakadesisyon na untang mosang-at og kaso batok sa mga opisyal sa gobyerno apan maayo nalang kay mipatuo sila sa iyang tambag ug nakombinse nga dili pakihaon.

 Matud pa ni Oaminal nga iya nang gipahibawo niini ang mga kasamtangang labaw nga opisyal sa DDB lakip na ang Malacañang apan wala kini manumbaling hinungdan nga may mga testigos nga nagmahay na karon sa kagamhanan kay nawad-an na sila og trabaho human sila motestigos pabor sa gobyerno. (BANATNEWS)