CEBU, Philippines - Patay diha-diha ang usa ka 42 anyos nga barangay electrician dihang usa ka wala hiilhing kriminal misaka sa ilang balay ug gipusil kini samtang nagkalingaw og tan-aw sa salida sa telebisyon kauban ang iyang tulo ka mga gagmay’ng anak didto sa barangay Captain Claudio, dakbayan sa Toledo sa miaging gabii.
Ang biktima mao si Victor Naporan, 42, minyo, nga molupyo sa maong lugar kinsa sa samang higayon maoy tig-instalar og kuryente ug tig-ayo usab sa mga instalasyon sa elektrisikad sa ilang lugar.
Si SPO4 Gil Lastimosa sa Toledo City Police Station mibutyag sa Banat News nga ang biktima uban sa iyang tulo ka mga anak nagtupad sa paglingkod nga nanan-aw og salida sa telebisyon sa ilang sala human sa panihapon .
Apan wala sila makabantay nga may mamumuno nga hilom nga misaka sa ilang balay ug diha-diha giluthang ang biktima nga nagtalikod sa ilang pultahan niadtong higayona.
Naigo sa ibabawn’g bahin sa bukobuko ang biktima nga maoy hinungdan sa hinanali niyang kamatayon.
Ang mga anak naniyagit gumikan sa hilabihang kakurat sa kakalit sa maong hitabo.
Human maluko ang biktima sa ilang sawog, dali kaayong nakasibat ang kriminal ug wala gayuy nakasaksi nga makatumbok sa ngalan ug ilhanan niini.
Gisuwayan pa og dala sa mga tagtungod ngadto sa tambalanan ang biktima apan gideklarar kining dead on arrival sa mga doctor sa tambalanan.
Ang mga polis nga misusi sa maong hitabo nakapunit og usa ka tingga sa bala sa wala matinong kalibre nga napiyape na ug gituohang maoy gigamit sa kriminal sa pagpatay sa biktima.
May katahap ang kapolisan nga personal nga panagdumot ang nagpaluyo sa maong pagpamusil.
Gisusi usab sa kapolisan kun wala ba kahay nasuko niini bahin sa iyang pagpangistalar og kuryente sa ilang barangay.
Wala usay tiyorya ang kapolisan nga may kalabtanan ang dagan sa politika sa maong lugar tungod kay dili kandidato ang biktima sa ilang dapit.
Sa pagkakaron nagpabilin pang blangko ang kapolisan ug wala pay natumbok nga mamumuno samtang wala usay silingan nga mihatag og kasayoran ngadto sa mga otoridad sa balaod bahin sa hinungdan sa pagpamusil ug sa ngalan sa kriminal. (BANATNEWS)