Run For Hope sa PNP, Comelec, IBP karon

CEBU, Philippines - Ipahigayon karong kaadlawon ang Covenant Run for Hope 2010 sa kadagkuan sa kapolisan dinhi sa tunga-tungang kabisay-an.

Ang mosalmot niining maong kalihokan mao ang mga sakop sa Commission on Elections (Comelec), Philippine National Police (PNP), Integrated Bar of the Philippines (IBP) Cebu City Chapter, mga sakop sa media ug ang religious sector.

Lakip sa motambong mao si PNP Director Jesus Versoza ingon man regional director sa Comelec nga si Rene Buac ug ubang opisyal.

Duha ka venues ang pagapilian alang sa mosalmot sa maong kalihokan, una diha sa atubangan sa Provincial Capitol, Fuente, Camp Sergio Osmeña Sr. sa Jones Avenue nga magsugod sa alas 4:30 sa kaadlawon ug adto mag-abot sa Archbishop Palace sa may D. Jakosalem sa alas-5 sa buntag diin mosunod dayon ang kalihokan.

Si PRO-7 Chief Supt. Lani-O Nerez sa dihang nahinabi sa mga tigbalita mipasabot nga ang tumong niining maong kalihukan mao ang awareness sa tanang sektor sa katilingban nga maghiusa ang tanan nga makab-ot ang kahusay’g kalinaw sa umaabot eleksyon karung sunod buwan dinhi sa kinatibuk-ang Central Visayas ilabina ang Sugbu.

Nanghinaot si Nerez nga dunay mga kandidatung moapil niining maong kalihukan aron sila magkasinabot sa usa’g-usa nga magpinirmahay sa usa ka peace covenant nga unta usa kanila mosaad nga dili momugna og kagubot atol sa adlaw sa piniliay.

Si Nerez mipasidaan hinuon sa tanan niyang sakop nga atol sa kalihokan walay magsul-ob o magsapaw og t-shirt nga dunay marka o pangalan sa usa ka kandidatu, ilabi na kadtong political color sa usa ka partido. – BANAT NEWS