Giluba nalang human magazine natagak

CEBU, Philippines - Usa ka lalaki ang gidunggab human mapalpak ang armas sa lalaking iyang gikaaway diha sa barangay Bangbang, sitio Bagong Dan, lungsod sa Cordova pasado alas onse sa miaging gabii.

Ang suspetsado nailhan nga si Moises Cedilla Dy, 26, molupyo sa maong barangay samtang ang biktima mao si Pepito Paderna Pungkol, 36, lumad nga taga Nasingin, probinsya sa Bohol apan kasamtangang nagpuyo sa nahisgutang lugar.

Sa wala pa ang hitabo, gikatahong gisulong sa biktima ang suspek gumikan sa pasangil sa naulahi kang Pungkol nga maoy responsable sa mga pagpangawat og traysikad sa maong lugar.

Wala mahimuot niini ang suspek ug kalit nga mibunot sa iyang paltik nga .45 kalibreng pistola dayong pusil ngadto sa walang bahin sa ulo sa biktima.

Apan gikatahong human niya mapusili makaduha ang biktima kalit nga natagak ang magazine niini ug mibunot nalang og icepick dayong dunggab sa ulo sa biktima.

Ang suspek daling miikyas human sa hitabo ug gilabay sa dalan ang gigamit niyang armas ug icepick apan nakit-an gihapon sa mga polis ang maong gilabay’ng armas ug ice-pick.

Sila si SPO1 Laurencio Wigwag, PO2 Andrew Salazar ug PO2 Alex Noron nga miresponde sa lugar nakapunit og usa ka buhing bala, duha ka kabhang, icepick ug laing kutsilyo diha sa crime scene.

 Ang biktima daling gidala sa Opon District Hospital apan taud-taud gibalhin kini sa Vicente Sotto Memorial Hospital.

Ang suspetsado nasikop pinaagi kang Rolando Casulla, miyembro sa Barangay Intelligence Network (BIN) sa maong barangay ug maoy nakatudlo kung kinsa ang mamumuno nga niadtong tungura nagkadugo na ang sapot. – BANAT NEWS