Gwen, Hunta ug opisyales angayang apilon sa imbestigasyon sa Balili

CEBU, Philippines - Mipadayag og dakong pagmahay si Provincial Board member Juan Bolo sa rekomendasyon nga gipagawas sa mga miyembro sa executive committee gipangulohan ni NBI-7 regional director Medardo Delemos nga nagpaubos kaniya sa administratiba o kriminal nga imbestigasyon labot sa kalambigitan niini sa kontrobersiyal nga pagpalit sa Kapitolyo sa P98 milyones kapin nga lote sa Balili Properties sa Tinaan, Naga.

Matud pa ni Bolo sa gipatawag niining press conference sa iyang buhatan nga dili lamang unta siya lang ipaimbestigar ug posibleng mapasakaan og kaso kundili iapil gyud usab si Gob. Gwendolyn Garcia. Iyang giklarong si Garcia mao gyuy mihatag kaniya og verbal nga awtorisasyonnga makig-negotiate ug mo-facilitate sa pamilyang Balili.

“Siya man ang nagsugo nako, apil sab siya sa kiha. Ako pay gisugo, ako pay naghimo sa tanang mga dirty works aron madali ang maong transaction, ako ra diay ang dat-ogan?” sigon pa ni Bolo.

Matud pa ni Bolo nga angayan nga iapil usab ang mga miyembro sa Cebu Provincial Appraisal Committee nga gipangulohan ni Provincial Assessor Anthony Sususco ug mga miyembro nga sila si Provincial Treasurer Atty. Roy Salubre ug Provincial Engr. Eulogio Pelayre.

Si Bolo miingon usab nga angayan usab nga apilon ang mga sakop sa Hunta Probinsiyal sanglit mao man kini ang naghatag og authorization ni Garcia sa pagsulod sa transaksyon sa Balili Properties.

Ang naasoy’ng bokal nagmahay ug misaad nga dili na gyud mousab pa sa pagsanong sa sugo sa buhatan sa gobernadora sama sa land deals sa Balili properties.

Tungod niini, si Bolo nagkanayon nga dako siyang uyon nga ipa-rescind ang kontrata tali sa Kapitolyo ug sa Balili families aron mauli ang kwarta kun si kinsa man ang nakasapi sa maong deal. Subling giasoy ni Bolo nga wala gyud siya makakwarta sa maong deal bisan usa ka sentimos kay ang iya mao ra ang pagtabang sa gobernadora nga makapalit og lote alang sa pagtukod sa plano sa probinsiya sa usa ka international port sa habagatan nga bahin sa lalawigan sa Sugbu.

Si Bolo, kinsa nangangkong wala siya’y nalapas nga balaod, nagkanayon nga naapektahan gyud ang iyang kandidatura sa maong isyu apan wala kini niya igsapayan sanglit daghan man ang mga barangay kapitan ang miduol kaniya ug mipadangat sa ilang simpatiya sa maong isyu.

Samtang si Capitol Consultant on Information Rory Jon Sepulveda miklarong ang rekomendasyon sa komitiba dili ang pagsaka og kaso kun dili pagpadayon sa imbestigasyon aron mahatagan og kahigayonan nga makatubag si Bolo ug aron matimbang-timbang kun may kriminal ug administrative liabilities ba kini o wala. – BANAT NEWS