RMG-7 paimbestigahan ni Nerez

CEBU, Philippines - Gimandoan ni PRO-7 Chief Supt. Lani-O Nerez si Sr. Supt. Rey Lendon Lawas, hepe sa Regional Mobile Group (RMG)-7 pag-imbestigar sa pasangil ni Bogo City Mayor Celestino “Junie” Martinez nga gi-ransack sa iyang mga sakop angsafehouse sa mayor niadtong Martes sa gabii.

Ang paimbestigahan mao ang company commander sa RMG nga nagbase sa maong siyudad nga si Insp. Ariel Arellano nga gi-ransak ang iyahang safehouse niadtong Martes sa gabii diha sa barangay Buac nga walay dalang search warrant.

Kini daan nang gipanghimakak ni Sr. Supt. Erson Digal, hepe sa kapolisan sa lalawigan sa Sugbu tungod kay nasayod silang dili legal ang pagpangsiksik nga walay basehanan ug labaw sa tanan walay dalang search warrant.

Apan si Nerez nagkanayon nga mis-communication lamang tali sa Mayor ug sa grupo ni Insp. Arellano kay matud niya, bag-ohay palang ang RMG nga nakabase diha sa maong dakbayan.

Matud pa niini, nga kun dunay bag-ong company sa RMG nga idestino sa usa ka lungsod o siyudad duna gyuy himuong orientation ug usa na niini mao ang pakig-alayon sa lokal nga kapolisan ug mga barangay tanod.

Si Arellano daan nga mihimakak niini ug nagkanayon nga igo ra silang nahiagi sa maong dapit ug aksidenteng ang napatrolyahan nilang dapit pribadong luna ug dead end ang agianan. – BANAT NEWS