Dalaga naghikog kay nag-selos

CEBU, Philippines - Gituohang tungod sa selos kay wala na mopauli ang iyang kapuyo, nagpakamatay ang usa ka 25 anyos nga dalaga pinaagi sa paghikog didto sa ilang pinuy-anan sa sitio Guilungsoran barangay Poblacion, lungsod sa Ginatilan kagahapon sa alas 3 sa kaadlawon.

Ang nagpakamatay mao si Estefanny Jane Villamora, 25, dalaga apan dunay kapuyo ug nagpuyo sa nahisgutang lugar.

Subay sa inisyal nga imbestigasyon ni SPO2 Vicente Rama sa Ginatilan Police Station ang biktima gituohang naguol human wala na mopauli sa ilang pinuy-anan ang kapuyo niini nga si Junjie Gomibao.

Subay sa imbestigasyon, si Gomibao nananghid ni Villamora nianang pagka-gabii nga mosuroy aron motan-aw sa gipahigayong liga sa basketball sa lungsod apan milawom na lang ang gabii ug wala kini mopauli ug pagkakadlawon nakit-an na lang ang biktima sa mga silingan nga nagbitay na sulod sa balay nga dunay higot ang liog ug nagbitay.

Habol nga giporma og pisi ang gigamit ni Villamora pagpakamatay paghigot sa iyang liog diin ang pikas tumoy iyang gibaat sa ibabaw nga bahin sa kahoy sa ilang balay.

Walay nakitang timailhan ang kapolisan nga dunay foul play ang kamatayon sa biktima ug gituohan niini nga tinuyo ang pagpakamatay tungod sa selos niini ngadto sa iyang kapuyo nga wala na mopauli. – BANAT NEWS